Kryeministri i Kosovës, Albin Kurti, ka reaguar për kidnapimin e 3 policëve në veri të Kosovës duke thënë se kjo është qartazi hakmarrje e Serbisë për arrestimin e djeshëm të Millenkoviqit, përcjell InLajmi
Kurti kërkoi lirimin e menjëhershëm të zyrtarëve policorë, derisa i ftoi ndërkombëtarët ta dënojnë këtë veprim të Serbisë.
Ai shtoi se hyrja e forcave të Serbisë në territorin e Kosovës është agresion dhe synim për eskalim dhe destabilizim të situatës.
Ndërkohë, kryeministri Kurti kërkon nga faktorët ndërkombëtarë dënimin e aktit agresiv nga Serbisë brenda territorit të Kosovës.
Postimi i plotë i tij:
3 zyrtarë të policisë së Kosovës janë rrëmbyer sot në Leposaviq në vendin ku dikur kishte një rrugë ilegale të kontrabandës e që ndodhet rreth 300 metra në brendësi të territorit të shtetit tonë.
Dyshojmë që ata janë rrëmbyer nga ushtria e Serbisë, qartazi si hakmarrje e Serbisë për arrestimin e djeshëm të kriminelit famëkeq Millun Millenkoviq – Lune, i cili paraqet një ndër krerët e krimit të organizuar dhe kontrabandës.
Policia e Kosovës është treguar tejet e vetëpërmbajtur këto javët e fundit.
Hyrja e forcave të Serbisë në territorin e Kosovës është agresion dhe synim për eskalim dhe destabilizim.
Kërkojmë lirimin e menjëhershëm të 3 zyrtarëve të rrëmbyer policor dhe ftojmë faktorët ndërkombëtarë që të dënojnë këtë akt agresioni të Serbisë. /InLajmi/
