Policia serbe gjatë të martës ka arrestuar disa shqiptarë në kufirin në mes Kosovës dhe Serbisë në Merdare, përcjell InLajmi.
Për këto arrestime reagoi kryetari i Komunës së Podujevës, Shpejtim Bulliqi i cili u shprehet i shqetësuar për veprimet e policisë serbe, ndërsa dyshon se arrestimet nuk janë asgjë tjetër vetëm hakmarrje.
Për më tepër Bulliqi ka kërkuar nga autoritetet e Kosovës që të veprojnë për lirimin e qytetarëve të arrestuar në Merdarë nga policia serbe.
Postimi i plotë i tij:
Me shqetësim mora lajmin që 3 qytetarë të Komunës së Podujevës janë arrestuar në kufirin mes Kosovës dhe Serbisë në Merdar.
Sipas informatave që kemi pranuar atyre ju është caktuar masa e paraburgimit për 48 orë nga autoritetet serbe, kurse për motivet e arrestimit të tyre nuk dihet përveçse po dyshojmë se janë hakmarrëse dhe po ndërlidhen me situatën në veri të vendit.
Arrestimi dhe mbajtja në paraburgim e 3 bashkëqytetarëve tanë është e papranueshme dhe kërkoj nga institucionet e Kosovës që të angazhohen maksimalisht për rastin e tyre, duke punuar me instancat kompetente për lirimin e tyre. /InLajmi/
