Eksperti i sigurisë, Bedri Elezi, thotë se presidentja e vendit, Vjosa Osmani, duhet t’i ndërpresë të gjitha aktivitetet në Strasburg, e njëkohësisht të kthehet në Prishtinë për tu takuar urgjent me Këshillin e Sigurisë.
Duke diskutuar për kidnapimin e tre zyrtarëve policorë nga forcat speciale serbe në Leposaviq, Elezi vlerësoi që madje do duhej të shpallet gjendje e jashtëzakonshme.
“Presidentja e Republikës së Kosovës si komandante e përgjithshme e ushtrisë së Kosovës, duhet t’i ndërpresë të gjitha aktivitetet e saja në Strasburg në Parlamentin Evropian dhe të niset në drejtim të Prishtinës, për të kërkuar një takim urgjent më Këshillin e Sigurisë. Ndoshta edhe duhet ta shpallë gjendjen e jashtëzakonshme. Duket që ishte një përgatitje e mirëfilltë, ata kishin ardhur me një grup të caktuar e me pajisje të caktuara”, deklaroi Elezi
Mirëpo, Elezi tha se është shqetësuese se si janë vendosur vetëm 3 zyrtarë policorë në atë pikë të kufirit, duke marrë parasysh gjendjen aktuale në veri, shkruan teve1.info.
“Po ashtu, ajo që të vë në dyshime, është se duke marrë parasysh gjendjen e sigurisë që e kemi, është e pakuptimtë në aspektin operacional se si i kanë vendosur vetëm 3 zyrtarë policorë në një pikë statike, në një vend ku vetë kryeministri, Albin Kurti, ka thënë që ka qenë një pikë e rëndësishme e kontrabandimit të armëve”, shtoi tutje Elezi në Tëvë1.
Sipas tij, zyrtarët policorë të dërguar në Leposaviq, nuk kanë qenë të përgatitur me pajisjet e nevojshme policore për raste emergjente.
