Zëdhënësi i Policisë së Kosovës, Baki Kelani ka shpalosur detaje për kidnapimin e zyrtarëve policor në afërsi të kufirit me Serbinë, ndërsa theksoi se ata ishin në detyrë zyrtare, raporton InLami.
“Ka ndodhur një kidnapim nga forcat serbe. Policia e Kosovës thotë se zyrtarët e Policisë kanë qenë në pikën statike në Bare, thellë në territorin e Kosovës. Ata kanë qenë në detyrë që të parandalojnë kontrabandimin e mallrave”, ka deklaruar Kelani.
Kelani thotë se Policia e Kosovës ka hasur lëvizje të njësiteve serbe që dyshohet se janë njësi policore.
“Menjëherë njësitet policore kanë shkuar në atë lokacion, por aty kanë gjetur vetëm automjetin zyrtar po jo edhe 3 policët”.
Kelani thotë se janë njoftuar edhe institucionet ndërkombëtare në mënyrë që sa më shpejt të lirohen policët e kidnapuar.
“Kidnapime të tilla klasike forcat serbe po përdorin që t’i mbrojnë kriminelët e përfshirë në raste të ndryshme”. /InLajmi/
