Shefi i Grupit Parlamentar të PDK-së, Abelard Tahiri, kujtoi 24-vjetorin e Çlirimit të Kosovës, duke vlerësuar lartë kontributin e ushtarëve të UÇK-së dhe mbështetjen e miqve ndërkombëtarë, përcjell InLajmi
Ndërsa shprehet falënderues, Tahiri tha se partneritetin me NATO-n dhe SHBA-në, duhet ta ruajmë më shumë se kurrë pasi që çlirimin e arritëm bashkë.
Më tej ai tha se tani kur liria është fakt, kemi shpresa që ajo do të bëhet edhe festë, me kthimin e çlirimtareve tanë nga beteja e fundit për të vërtetën e epokës së lavdishme të UҪK-së.
Postimi i plotë i tij:
Duke kujtuar 12 qershorin e 1999-tës, sot 24 vite pas, nderojmë dëshmorët e UÇK-së, që me jetën e tyre e vendosën themelin e atdheut tonë të lirë e të pavarur. Çlirimi i Kosovës nga robëria, i dha fund një tragjedie njerëzore dhe restauroi një të drejtë kombëtare, 2 anë vendimtare që i arritëm bashkë me NATO-n dhe veçmas me SHBA-të, partneritetin me të cilët duhet ta ruajmë sot më shumë se kurrë.
24 vite në liri, kanë qenë një përvojë e jashtëzakonshme transformuese dhe me shumë vlerë për vendin tonë. Tashmë kur liria është fakt, kemi shpresa që ajo do të bëhet edhe festë, me kthimin e çlirimtareve tanë nga beteja e fundit për të vërtetën e epokës së lavdishme të UҪK-së.
Urime Dita e Çlirimit! /InLajmi/
