Kryetari i Komunës së Ferizajt Agim Aliu më rastin e 24 vjetorit të çlirimit të Kosovës bashkë me zyrtarë të tjerë të komunës bëri homazhe në nderim të dëshmorët rënë të këtij qyteti, përcjell InLajmi
Duke nderuar të rënët për liri, Aliu deklaroi se liria, pavarësia, republika janë vepër e heronjve dhe dëshmorëve të kombit.
Rikujtojmë se 24 vjet më parë në Kosovë u vendosën 50 mijë ushtarë të NATO-s dhe bashkë me ta edhe administrata e përkohshme e Kombeve të Bashkuara.
Postimi i plotë i tij:
Liria e ëndrruar prej shekujsh, erdhi me lumin e gjakut të Dëshmorëve të Kombit, martirëve e brezave përgjatë shekujve, erdhi me emblemën e krenarisë sonë kombëtare – Ushtrisë Çlirimtare të Kosovës, erdhi me krismat e pushkës së luftëtarëve të lirisë, erdhi me pendën e atdhedashësve, erdhi ta gëzojmë sot të gjithë, fëmijët, të moshuarit, burrat e gratë e çdo moshe.
Liria, pavarësia, Republika janë vepër e heronjve, Dëshmorëve të Kombit, sakrificës sublime e amanetit të tyre, e si sot, në 24 vjetorin e Çlirimit të Ferizajt, nderojmë e përkulemi, sa të jetë jeta, veprën e sakrificën sublime të Dëshmorëve të Kombit të UÇK-së, luftëtarëve e martirëve të lirisë!
Lavdi Dëshmorëve të Kombit dhe të rënëve për liri!
Urime 24 vjetori i Çlirimit!
Urime 12 Qershori – Dita e Çlirimit të Ferizajt! /InLajmi/
