Në kuadër të manifestimit tradicional “Ditët e Lidhjes”, e në organizim të Shoqatës për Kulturë dhe Art “Fidani” në Prizren, në ambientet e Bibliotekës ndërkomunale të qytetit, u organizua takimi me shkrimtarin tonë të mirënjohur Agim Gjakova me moton “Tri kohë për atdheun” – shkruan InLajmi.
Në një ambient të mrekullueshëm që ofron biblioteka e qytetit, para një numri të madh të adhuruesve të librit, për jetën dhe veprën e shkrimtarit, poetit, dramaturgut dhe publicistit Agim Gjakova, foli gazetari Osman Goranci.
“Agim Gjakova, bir i dy mësuesve dhe patriotëve gjakovar gjakovarë, është shkrimtar i dy anëve të kufirit. Pas mbarimit të shkollës Normale në Gjakovë, shkoi student në Beograd në fakultetin filozofik. Fryma atdhetare nuk e la të qetë edhe atje dhe bashkë me shokët formoi shoqatën e studentëve shqiptarë “Përpjekja”.
Meqë në vitet ’50-ta, konsiderohej si kërcënim për Jugosllavinë me deklaratat e tija të hapura kundër keqtrajtimit të shqiptarëve të Kosovës, u dërgua në internim në kampin e Gerovos në Kroaci, kurse në maj të vitit 1960 zyrtarët e UDB-së e dëbuan në kufirin shqiptar si person të padëshirueshëm për ish Jugosllavinë. Gjatë qëndrimit në Shqipëri, në vitin 1966, kreu studimet në Fakultetin Histori-filologji dega letërsi frenge në Tiranë, mirëpo gjatë gjtihë kohës ishte I ndjekur nga sigurimi i shtetit, ngase nuk ishte i listuar si mbështetës i Partisë së Punës Shqiptare (PPSH). Përkundër gjithë këtyre peripetive Gjakova arrinë të mbijetoj dhe pas përfundimit të në luftës në Kosovë, u shpërngul në Prishtinë ku edhe jeton dhe vepron. Agim Gjakova është autor i afro 40 librave, 22 romane, 10 përmbledhje poetike, 4 drama, etj. – përfundoi Goranci.
Për takimet e ngrohta që ka patur me Gjakovën në Shqipëri, gjatë periudhës së viteve të 90-ta, foli gazetari dhe publicist Fahri Musliiu, I cili theksoi se nga Agim Gjakova ka marrë shumë këshilla të cilat edhe i kanë ndihmuar gjatë ushtrimit të profesionit të tij si gazetar. Ndërkaq, Prof. Vëllaznim Bytyqi e lexoi kumtesën e Prof. Dr. Besim Muhadri nga Amerika, për romanin e Agim Gjakovës, “Krimbat”, kurse Berat Batiu, foli për bashkëpunimin që ka patur si botues i revistës “Fidani”, kur A. Gjakova ishte redaktor kulture në gazetën “Bota Sot”.
Të theksojmë se ky evinement u përkrah nga Drejtoria për Kulturë, Rini dhe Sport e Prizrenit. /InLajmi/
