Deputeti i VV-së, Dimal Basha, ka reaguar pasi kryeministri i Shqipërisë, Edi Rama, tha se ia ka propozuar kancelarit Scholz dhe presidentit Macron një draft statut të Asociacionit për Kosovën, përcjell InLajmi
Basha i “nervozuar” shprehet se aq shumë qenka i shqetësuar Rama për mikun e tij (Vuçiqin), sa që ka marrë mundin e ka hartuar draft statutin.
Ndërsa kritikoi për ‘përzierje” në “punët e brendshme të Kosovës”, Basha i kujton kryeministrit Rama se tani ka kush të kujdeset për Kosovën, sepse tha ai nuk janë në pushtet politikanët e dikurshëm që të kanë ngarkuar me shqetësime të ndryshme.
Për më tepër ai ka pyetur kryeministrin Rama nëse ka dorëzuar ndonjë statut për Luginën tek bashkësia ndërkombëtare.
Postimi i plotë i tij:
Qenka shqetësu Kryeministri Edi Rama për shqetësimin e mikut të tij, e që është Asociacioni. Bile e paska marrë mundin me draftu një statut!
- Rama, a keni dërguar tek bashkësia ndërkombëtare ndonjë statut për ndonjë Asociacion për shqiptarët e Luginës?
I dashur Kryeministër Rama, e di që në të kaluarën politikanë tanë në Kosovë të kanë ngarkuar me shqetësime të ndryshme, mirëpo kanë ndërruar kohërat dhe personalisht të liroj nga ky shqetësim, sepse Kosova tani ka mjaft njerëz që kujdesen dhe shqetësohen për Kosovën. /InLajmi/
