Komisioni Qendror i Zgjedhjeve është i gatshëm të organizojë edhe njëherë zgjedhjet në Veri, kurdo që kërkohet mbajtja e tyre.
Skenari i përsëritjes së zgjedhjeve po shihet si i duhuri për shtensionimin e situatës në komunat veriore, të banuara kryesisht me serbë, Leposaviq, Zveçan, Zubin Potok e Mitrovicë e Veriut.
“Komisioni Qendror i Zgjedhjeve, si institucion i përhershëm kushtetues, e ka për detyrë kryesore organizimin e zgjedhjeve kurdo që ato shpallen. Si çdoherë, ashtu siç kemi thënë edhe në të kaluarën, KQZ-ja është e gatshme për të përmbushur detyrat që dalin nga Kushtetuta dhe ligjet në fuqi”, thanë nga ky institucion
Kryetarët shqiptarë që dolën nga zgjedhjet e 23 prillit nuk po pranohen nga serbët lokalë atje, të cilët edhe bojkotuan procesin.
Këta kundërshtuan ashpër përmes protestave, të cilat vazhdojnë edhe tash pas gati 2 javëve, shkuarjen e shefave të rinj komunal me asistimin e Policisë në objektet qendrore komunale.
Për zgjedhjet, rezultatet e të cilave s`po pranohen, shteti kishte ndarë mbi gjysmë milion euro.
Akoma nuk dihet se sa u shpenzuan saktë për to e as sa do të kushtonin këto të rejat.
“Meqenëse kemi pak kohë largë nga dita e zgjedhjeve të 23 prillit, ju njoftoj se KQZ-ja është duke përmbyllur detyrimet financiare nga ky proces dhe sipas ligjit do të publikohet një raport i plotë për shpenzimet zgjedhore dhe mënyrën e shpenzimit. Po sipas ligjit, afati për këtë është brenda 60 ditëve prej ditës së shpalljes së rezultatit të zgjedhjeve”, thanë nga KQZ.
Ish-kryetari i KQZ-së, Mazllum Baraliu vlerëson se aktualisht kushte për mbajtjen e tyre nuk ka, por që s`është problem të krijohen ato.
“Kushte aktualisht nuk mendoj që janë kushtet të volitshme, por mund të krijohen ato nëse ka efekt takimi që ndodhi mes Presidentes Vjosa Osmani dhe homologut të saj, Aleksandër Vuçiq, ku prezent ishte edhe kryedyshja lidere franko-gjermane, Emmanuel Macron dhe Olaf Scholz”.
Dalja e qytetarëve nëpër qendrat e votimit kushtëzohet me disa procedura, shkruan FrontOnline
“Stabilitet, gjendja të jetë stabile, të ndodh dorëheqja e kryetarëve apo shkarkimi i tyre, varianti i tretë 20 % e elektoratit në Veri të deklarohet për zgjedhje të reja. Nëse do Vuçiq, zgjedhjet mbahen pa problem dhe serbët dalin në votime dhe do të kishte ligjitimitet kinse që po i mungojka tash, e që nuk mendoj se qëndron”, u shpreh Baraliu
