Kryetari i Lidhjes Demokratike të Kosovës, Lumir Abdixhiku ka pritur në takim ambasadorin e Britanisë së Madhe në Kosovë, Nicholas Abbott, me të cilin përveç tjerash diskutoi edhe mbështetjen e miqve të saj sot, por edhe në të ardhmen, përcjell InLajmi
Në takim është diskutuar për situatën aktuale politike në vend, me theks të veçantë gjendjen e tensionuar në veri të vendit.
Kryetari Abdixhiku, ka njoftuar ambasadorin Abbott për qëndrimin e LDK-së për tensionet në veri si dhe nevojën që në momente të tensioneve e provokimeve nga Serbia, ecja e përbashkët me aleat për të përballuar një krizë është domosdoshmëri.
“Në këtë moment, Kosovës i duhen gjithë miqtë e saj, përplasja me ta është devijim strategjik e dështim diplomatik me pasoja afatgjata”, është shprehur Abdixhiku.
I pari i LDK-së, ka falënderuar ambasadorin Abbott dhe Britaninë e Madhe si partner strategjik për rolin dhe kontributin e saj në forcimin dhe konsolidimin e shtetit të Kosovës. /InLajmi/
