Deputetja, Rrezarta Krasniqi tha se janë me kryeministrin Kurti kundër Serbisë, por jo kundër SHBA-së.
“Ne jemi për sovranitet me u shtri në veri, jemi me kryeministrin kundrejt Serbisë, por jo me pasë kundër Shtetet e Bashkuara të Amerikës, të cilët ata na kanë ndihmu me qenë sot shtet. LVV nuk është më e madhe se Kosova. Përveç që është kryeministër i VV-së, është i Kosovës, duhet me i dëgju pak partitë opozitare, duhet me bashkëpunu sa më ngushtë me SHBA-në dhe BE-në”, tha ajo.
Shqetësuese sanksionet e SHBA-së, i konsideron edhe deputetja Krasniqi.
Ajo thotë se kjo qeveri qe 2 vite ka pësuar vetëm regres në politikën e jashtme.
“Gjendja është tepër shqetësuese, duke e parë që çdo ditë secili me deklaratë për sanksione ndaj Kosovës. Prej që ka ardh kjo Qeveri për të satën herë e kam thënë që kemi pasë vetëm regres në politikën e jashtme, asnjë njohje për 2 vjet e gjysmë, asnjë anëtarësim në organizatën ndërkombëtare, ndërsa sot edhe ato që jonë me liberalizimin e vizave, domethënë pranimin për aplikim në Këshillin e Evropës e kemi parë çfarë sanksione na dhanë, është shqetësuese shumë për vendin kjo”, shprehet Krasniqi.
Ajo thotë se Kurti duhet të tregojë në Kuvend se çfarë marrëveshje është duke e bërë.
“Po presim kryeministri me ardh të premten në Kuvend edhe me tregu se çka ka lidhur me këto sanksione, çfarë marrëveshje është duke bërë që ne nuk po shohim kurgjo hiç”, tha ajo.
Ambasadori amerikan në Prishtinë, Jeffrey Hovenier, tha se anulimi i pjesëmarrjes së Kosovës në stërvitjet Defender Europe 2023, është pasoja e parë për Qeverinë e Kosovës, që ka refuzuar thirrjet e Washingtonit që të shtensionojë situatën në veri, dhe jo vetëm.
Sipas tij, Shtetet e Bashkuara i kanë 2 kërkesa për Qeverinë e Kosovës: të mos insistojë që kryetarët të punojnë nga ndërtesat komunale, dhe që t’i tërheqë zyrtarët policorë nga tri ndërtesat komunale në veri.
Nga 26 maj, në veri të Kosovës janë shtuar tensionet, pasi Policia e Kosovës ka ndërhyrë për të mundësuar hyrjen e kryetarëve të rinj në objektet komunale në Zubin Potok, Leposaviq dhe Zveçan, shkruan Front Online.
Përplasje ndërmjet pjesëtarëve të KFOR-it dhe grupeve të qytetarëve serbë që kanë protestuar para objekteve komunale, në këto komuna të banuara me shumicë serbe, janë shënuar të hënën, ku si pasojë kanë rezultuar me dhjetëra të lënduar.
