Shefi i deputetëve të AAK-së, Besnik Tahiri, ka thënë se për këtë parti, është tepër me rëndësi që të niset një mocion i mosbesimit për Qeverinë Kurti, përcjell InLajmi.
Tahiri tha se të martën kanë kërkuar që Kurti të dorëhiqet për qasjen që e ka, ku sipas tij, Kosova po vazhdon me shpejtësi ta humb sovranitetin në veri.
Tutje, ai tha se për AAK-në institucionet janë të shenjta, e as kriminelët e Vuçiqit nuk do të mundin ta sfidojnë shtetin e Kosovës.
Postimi i plotë i tij:
Pas mbledhjes së Kryesisë së Kuvendit, para mediave paraqita qëndrime e AAK-së lidhur me situatën aktuale në Veri të Kosovës.
– Kuvendi i Kosovës, partitë politike, institucionet e Kosovës nuk mund të sillen kinse nuk është ka ndodhë asgjë në këtë vend.
– Gjendja është e jashtëzakonshme dhe për rrjedhojë nuk mund të sillemi zakonshëm.
Për AAK-në është shumë me rëndësi që të nisë një mocion i mosbesimit të Qeverisë Kurti, për arsyet si:
- Me qasjen e Qeverisë dhe kryeministrit Kurti, Kosova po vazhdon me shpejtësi ta humb sovranitetin e saj në Veri të Kosovës. Nga marrja e vendimit për targa, Kosova në atë pjesë të vendit është vetëm duke u dobësuar dhe duke e humbur sovranitetin.
- Me këtë qasje, na solli në situatë, ku KFOR-i dislokon trupa shtesë në Veri të Kosovës, bazuar në Rezolutën 1244. Në fakt, ky dislokim po ndodhë 15 vjet pas shpalljes së pavarësisë së Kosovës.
- Qeveria Kurti na solli në një situatë me aleatin më të madh – ShBA-në – garantuesin e sovranitetit e shtetësisë dhe pavarësisë së vendit tonë, të na vendosin sanksione. Sanksione të cilat e kanë goditur në themel funksionimin e shtetit, duke larguar Kosovën nga Defender Europë 2023, e deri te masat tjera të cilat pritet të ndodhin.
Nuk ka logjikë, në kohën kur aleati jonë kryesor e ka problemin më të madh të sigurisë në luftën në Ukrainë, t’ia hapim edhe një problem tjetër të sigurisë në Ballkanin Perëndimor me Veriun e Kosovës.
Për AAK-në institucionet janë të shenjta, as kriminelët e Vuçiqit, e as policët me uniforma e pa uniforma, nuk do të mund asnjëherë ta sfidojnë shtetin e Kosovës.
Shteti e shtëpia mbahen me miq, e mik më të mirë se sa Amerika, populli i Kosovës nuk ka.
Albin Kurti e LVV-ja duhet t’i hapin sytë mirë dhe të mendojnë se ku jemi sot. AAK-ja është ajo që e ka mbështetur marrëveshjen finale me Serbinë, që nga dita e parë, i ka qëndruar në krah në të gjitha betejat që i ka pasur me Serbinë si për zgjedhjet, referendumin, e çështje tjera.
Ne, nuk mund t’i japim mbështetje një kryeministri, i cili na solli në një situatë që ShBA-ja të na vë sanksione. Këtë shtet dhe këtë liri e kemi fituar falë luftës së gjeneratave deri te UÇK-ja, në bashkërendim dhe partneritet me Amerikën dhe NATO-në.
E dimë që ky komunikim me ShBA-në është përgjegjësi politike, shtetërore e institucionale dhe e kemi obligim t’i tregojmë Qeverisë Kurti, që kjo është rrugë qorre.
Për t’u integruar Veriu i Kosovës, fillimisht është dashur të integrohet politika e përbashkët Kosovë-ShBA, e jo të vijmë në këtë situatë. As ShBA-ja nuk dëshiron ta godas një shtet, të cilin e ka njohur së pari dhe për të cilën ka bërë të pamundurën për ta mbrojtur e zhvilluar.
Në interesimin e mediave lidhur me mocionin ndaj Qeverisë Kurti, theksova kërkesën e djeshme të kryetarit Haradinaj për dorëheqjen e kryeministrit Kurti. Ky është një proces i cili kërkon një bashkërendim.
Ndërkaq, sa i përket zgjedhjeve në komunat në veri, theksova se bojkoti është një instrument demokratik, sikurse marrja e legjitimitetit përmes votës që është po ashtu proces demokratik. E dimë sa kanë votuar atje, ky eksperiment nuk i ka ndihmuar Kosovës dhe as integrimit të veriut, por e ka dobësuar. /InLajmi/
