Pas rritjes së tensioneve në veri të vendit ka reaguar sërish sekretari amerikan i Shtetit, Antony Blinken, i cili u ka bërë thirrje të dyja palëve që të ndërmarrin veprime të menjëhershme për të ulur tensionet, përcjell InLajmi.
Blinken dënoi dhunën e ushtruar nga protestuesit serbë kundër trupave të KFOR-it, forcave të rendit dhe gazetarëve.
Sipas tij, situata në veri u përshkallëzua për shkak të vendimeve të Qeverisë së Kosovës për hyrjen me forcë të kryetarëve të rinj në objektet komunale.
Ai ka kërkuar nga Qeveria e Kosovës që kryetarët e zgjedhur të kryejnë detyrat e tyre nga lokacione alternative dhe jo në ndërtesat komunale ndërsa i ka bërë thirrje Serbisë që të ulë statusin e sigurisë së Forcave të Armatosura dhe t’u bëjë thirrje serbëve që të përmbahen nga dhuna e mëtejshme.
Në fund, Blinken ua bën të qartë të 2 palëve se duhet të angazhohen në dialog për normalizimin e marrëdhënieve.
Deklarata e plotë e Blinken:
U bëjmë thirrje të gjitha palëve që të ndërmarrin veprime të menjëhershme për të ulur tensionet. Shtetet e Bashkuara dënojnë dhunën e papranueshme dje kundër trupave të KFOR-it të udhëhequr nga NATO, forcave të rendit dhe gazetarëve.
Vendimi i Qeverisë së Kosovës për të detyruar hyrjen në ndërtesat komunale përshkallëzoi tensionet në mënyrë të mprehtë dhe të panevojshme. Kryeministri Kurti dhe qeveria e tij duhet të sigurojnë që kryetarët e zgjedhur të kryejnë detyrat e tyre kalimtare nga lokacione alternative jashtë ndërtesave komunale dhe të tërheqin forcat policore nga afërsia. Presidenti Vuçiq dhe Qeveria e Serbisë duhet të ulin statusin e sigurisë së Forcave të Armatosura Serbe dhe t’u bëjnë thirrje serbëve të Kosovës që të ndalojnë së sfiduari KFOR’in dhe të përmbahen nga dhuna e mëtejshme.
Si Kosova ashtu edhe Serbia duhet menjëherë të angazhohen në Dialogun e lehtësuar nga BE-ja për normalizimin e marrëdhënieve. /InLajmi/
