Ish-presidenti i Kosovës, Hashim Thaçi të hënën ka qëndruar vetëm pak orë në Kosovë, për të vizituar nënën e tij të sëmurë, vizitë kjo që i ishte aprovuar nga Trupi Gjykues në Dhomat e Specializuara në Hagë.
Shefja e Njësisë për Informim dhe Komunikim me Publikun, Angela Griep, ka konfirmuar se Thaçi është transferuar sërish mbrëmë në ambientet e paraburgimit të Dhomave ë Specializuara në Hagë.
“Trupi Gjykues kishte udhëzuar Sekretarin që të menaxhonte një vizitë paraburgimi në Kosovë për z. Thaçi për të takuar familjen e ngushtë për shkak të arsyeve detyruese humanitare. Z. Thaçi është transferuar sërish në ambientet e paraburgimit të Dhomave të Specializuara në Hagë mbrëmjen e djeshme”, ka thënë Griep
Arsyeja e ardhjes së Thaçit në Kosovë ishte për të vizituar nënën e tij, e cila ditë më parë kishte disa probleme shëndetësorë dhe ishte e shtrirë në spital.
Thaçi në Kosovë kishte arritur rreth orës 12:30 dhe menjëherë ishte dërguar për në Burojë.
Atij i ishte lejuar të takohet vetëm nga afër vetëm me prindërit e tij.
Ndaj ish-presidentit të Kosovës, Hashim Thaçi, rëndojnë akuzat për krime lufte dhe krime kundër njerëzimit, shkruan Reporteri
Ai ndodhen në paraburgim që nga nëntori 2020. Thaçi është deklaruar i pafajshëm për të gjitha akuzat që rëndojnë mbi të.
