Ish-presidenti Fatmir Sejdiu tha se shihet qartë që protestat në veri janë të dhunshme dhe të udhëhequra nga bandat e njohura serbe tash e përtej 2 dekadash, përcjell InLajmi.
Sejdiu tha se sulmet në veri ndaj KFOR-it dhe policisë kanë për qëllim nxitjen e gjakderdhjes dhe se nuk e kanë hallin e paqes e demokracisë.
Këto 2-3 ditë gazetarët e Kosovës iu nënshtruan një presioni të madh deri në rrezikim jete, arsyeja dihet: të mos dalin para botës pamjet se çfarë po bëjnë akteret e kësaj dhune, shtoi ai.
Gjithashtu Sejdiu i’u ka bërë thirrje institucioneve e Republikës së Kosovës që të thellojnë bashkëpunimin me partnerët ndërkombëtarë.
Postimi i plotë i tij:
Ditët e sprovave të mëdha
Tash e sa ditë në komunat e veriut të Kosovës, ku ka një shumicë të komunitetit serb, grupe të organizuara po kundërshtojnë me dhunë e përgjakje stabilizimin e jetës së qytetarëve dhe të vet institucioneve të shtetit të pavarur – Republikës së Kosovës, duke dashur të vazhdojnë me anarki.
Shihet qartë se ato janë protesta të dhunshme dhe të udhëhequra nga bandat e njohura tash e përtej 2 dekadash.
Të nxitura e të përgatitura në vazhdimësi nga Beogradi ato me dhunë e sulme ndaj policisë së Kosovës dhe forcave të KFOR-it, ato duan të nxisin gjakderdhje sikur që vepruan sot ndaj policëve dhe ushtarëve. Nuk e kanë hallin e paqes e të demokracisë, por përkundrazi duan destabilitetin e Kosovës dhe përtej saj.
Institucionet e Republikës së Kosovës duhet të thellojnë bashkëpunimin me partnerët ndërkombëtarë, prirë nga SHBA-të për të kapërcyer këtë gjendje që provokon paqen dhe stabilitetin.
Këto 2-3 tre gazetarët e Kosovës iu nënshtruan një presioni të madh deri në rrezikim jete. Arsyeja dihet: të mos dalin para botës pamjet se çfarë po bëjnë akteret e kësaj dhune.
Prandaj, gazetarëve duhet t’ju sigurohet mbrojtje dhe mbështetje, sepse vetëm kështu mbrojmë dhe përçojmë të vërtetën./InLajmi/
