Kryetari i Kuvendit të Kosovës, Glauk Konjufca, ka reaguar për situatën e tensionuar në Veri të Kosovës, duke dënuar sulmet e protestuesve serbë ndaj pjesëtarëve të KFOR-it, përcjell InLajmi.
Konjuca ka shprehur solidaritetin personal dhe institucional për 25 ushtarët e plagosur të KFOR-it duke i’u uruar shërim sa më të shpejtë.
Ai gjithashtu u ka bërë thirrje ambasadave të vendeve mike që ta dënojnë ashpër dhunën e strukturave kriminale të cilat mbështeten nga Aleksandër Vuçiq.
Është koha që dhunës t’i përgjigjemi me një zë të përbashkët. Ajo nuk mund të tolerohet, përfundoi Kreu i Kuvendit.
Postimi i plotë i tij:
Dënoj ashpër dhunën e bandave të organizuara kriminale serbe ndaj trupave të KFOR-it, Policisë së Kosovës dhe gazetarëve në terren!
Shpreh solidaritetin tim personal dhe institucional për 25 ushtarët e plagosur të misionit paqeruajtës dhe uroj shërim sa më të shpejtë!
Pjesëmarrja e njerëzve të maskuar në atë që u prezantua si protestë, shpërfaqja e simbole të luftërave gjenocidale serbe dhe pushtimit rus në Ukrainë, sulmet ndaj gazetarëve dhe mediave, përdorimi i mjeteve dhe dhunës së rëndë ndaj trupave të ruajtjes së rendit, tregojnë atë që tashmë dihej: synimin për ta mbajtur të shkëputur pjesën veriore të vendit tonë nga çdo prekje e ligjit dhe rendit që disponon Republika e Kosovës.
Ndërkohë, shfrytëzoj rastin t’u bëj thirrje ambasadave të vendeve mike ta dënojnë ashpër dhunën e strukturave kriminale, të cilat haptazi janë të mbështetura nga presidenti serb, Aleksander Vuçiq dhe që synojnë destabilizimin e vendit tonë!
Gjithashtu, i bëj thirrje organeve kompetente të drejtësisë që të nisin hetimet ndaj atyre që i bënë këto akte të dhunshme ndaj trupave të KFOR-it, Policisë së Kosovës dhe gazetarëve të terrenit!
Është koha që dhunës t’i përgjigjemi me një zë të përbashkët. Ajo nuk mund të tolerohet!/InLajmi/
