Mungesa e informatave nga shteti serb dhe mosgatishmëria për të bashkëpunuar, ka bërë që për afër 3 vite të mos ketë gërmime në Serbi. Si pasojë e kësaj, shteti serb po vazhdon t’i mbajë të fshehur fatin e mbi një mijë e 600 personave të zhdukur në luftën e fundit në Kosovë.
Personat kompetent që merren me gërmime të të pagjeturve, e vlerësojnë si sfidues këtë çështje, duke u shprehur se është e domosdoshme qasja në arkivat e institucioneve serbe.
Kushtrim Gara nga Komisioni Qeveritar për të Pagjeturit, thotë se në bazë të informacioneve, ekzistojnë mbetje mortore të 2 viktimave të luftës në hapësirën e quajtur “varrezat e besimtarëve myslimanë” në veri të Mitrovicës.
“Në rastin e lokacioneve në Komunën e Zubin Potokut, ne jemi në shqyrtim të informatave plotësuese, në përpjekje për të saktësuar lokacionin e mundshëm për varreza masive në rastin që ne e quajmë si grupi i intelektualëve dhe të njëjtën kohë jemi duke punuar edhe në shqyrtim të informatave për mundësinë e saktësimi të 2 lokacioneve meqë mbi bazën e të dhënave që ne kemi, duhet të jenë edhe mbetje mortore të 2 viktimave të luftës në hapësirën e varrezave në veri të Mitrovicës në pjesën që njihet si ‘varrezat e besimtarëve myslimanë’”, ka thënë Gara.
Që nga 2021-ta, Gara thotë se nuk kanë arritur ta saktësojnë një lokacion për gërmime ndërmjet fshatrave Dreth-Kalludër. Prandaj, Gara e sheh të domosdoshme qasjen në arkivat e institucioneve serbe, shkruan EO
“Në rastin e lokacionit mes fshatrave Dreth-Kalludër, ka pasur gërmime në vazhdimësi edhe gjatë kohës së UNMIK-ut, pastaj të EULEX-it edhe ne si institucione në vjeshtën e vitit 2021 kemi qenë të angazhuar në këtë lokacion, mirëpo fatkeqësisht deri më tani nuk është arritur të saktësohet lokacioni, mbi bazën edhe të mundësisë së lëvizjes së lokacionit ose kufomave për shkak siç e kemi thënë në vazhdimësi se ka një lloj hezitimi nga pala serbe për mosbashkëpunim. Prandaj është më së e nevojshme qasja në arkivat e institucioneve serbe dhe besoj se në bazën e këtij informacioni, ne do të arrijmë të saktësojmë lokacionin e mundshëm”, u shpreh ai.
