Pas tensioneve në veri të Kosovës, ku shumë qytetarë serbë kanë bllokuar hyrjen në Komunën e Zveçanit, ka reaguar ministri i Administrit dhe Pushtetit Lokal, Elbert Krasniqi, përcjell InLajmi.
Krasniqi rikujtoi se për kryetarit e rinj në veri sot është dita e parë e punës ndërsa theksoi si institucione qendrore e kanë për obligim që t’ua sigurojnë dhe mundësojmë kryerjen e detyrës.
Ai shtoi se institucionet e Kosovës do të japin mbështetjen e plotë në përmbushjen e obligimeve kushtetuese dhe ligjore për kryetarët e rinj.
Postimi i plotë i tij:
Pas mbajtjes së zgjedhjeve të datës 23 prill, janë mbajtur seancat konstituive në Mitrovicën Veriore, Zveçan, Zubin Potok dhe Leposaviq.
Dje u betuan edhe kryetarët e komunës së Zveçanit, Zubin Potokut dhe Leposaviqit. Për ta sot është dita e parë e punës. Punë dhe shërbim të cilin duhet ta kryejnë nga zyret e Komunave bashkë me shërbyesit civilë.
Ata janë zotuar që do t’i shërbejnë të gjithë qytetarëve pa dallim. Si ministri dhe institucione qendrore japim mbështetjen tonë të plotë në përmbushjen e obligimeve kushtetuese dhe ligjore të kryetarëve të rinj. E si institucione qendrore e kemi obligim që t’ua sigurojmë dhe mundësojmë përmbushjen e këtyre obligimeve. /InLajmi/
