Presidenti serb, Aleksandar Vuçiq të enjten priti në takim senatorët amerikanë Chris Murphy dhe Gary Peters, me ç’rast ka theksuar se për Serbinë prioritet është formimi i Asociacionit të komunave me shumicë serbe, sipas Marrëveshjes së Brukselit, transmeton InLajmi
Presidenti serb ka falënderuar senatorët për angazhimin dhe mbështetjen amerikan në procesin e dialogut Kosovë-Serbi, ndërsa ka theksuar se diskutimet kanë qenë në shumë drejtime, por fokusi ishte te asociacioni.
“E theksova se prioritet është formimi i Asociacionit, si dhe se do të vazhdojmë të insistojmë në zbatimin ekskluziv të vendimit për Asociacionin ashtu siç është paraparë në Marrëveshjen e Brukselit”, ka theksuar Vuçiq.
Presidenti posaçërisht theksoi se Beogradi që nga fillimi ka treguar seriozitet dhe përgjegjësi në procesin e dialogut, përkundër provokimeve të vazhdueshme dhe lëvizjeve të shumta të njëanshme të Prishtinës, të cilat pengojnë gjetjen e një zgjidhjeje kompromisi dhe të qëndrueshme.
Duke folur për situatën aktuale gjeopolitike dhe të sigurisë në botë, presidenti ka ripërsëritur se Serbia mbetet e përkushtuar ndaj politikës së qëndrueshme të mbrojtjes së interesave kombëtare dhe shtetërore, si dhe respektimit të parimeve të integritetit territorial dhe sovranitetit shtetëror.
Presidenti shtoi se është me interes kyç për Serbinë ruajtja e stabilitetit në rajon, agjenda pozitive dhe forcimi i bashkëpunimit rajonal në të gjitha fushat, veçanërisht në fushën e ekonomisë, ku Serbia, përmes iniciativave si Ballkani i Hapur, promovon në mënyrë të vazhdueshme dhe këmbëngulëse një politikë të orientuar drejt së ardhmes, duke u fokusuar në bashkëpunimin me përfitim reciprok, thuhet në njoftim. /InLajmi/
View this post on Instagram
