Ambasadori amerikan në Kosovë, Jeff Hovenier ka folur rreth çështjes së themelimit të Asociacionit.
Hovenier tha se Kosova është zotuar në vitin 2013 për krijimin e Asociacionit të Komunave me Shumicë Serbe dhe sipas tij, kjo është çështje urgjente, ka folur në RTV21.
“Kosova është zotuar në vitin 2013 për krijimin e Asociacionit të Komunave me Shumicë Serbe. Ne kemi qenë shumë të qartë publikisht për një kohë të gjatë dhe presim të bëhet dhe tani është më urgjente dhe në kohë sepse është një element fondamental i përgjegjësisë së Kosovës dhe përkushtimit të Kosovës edhe me Marrëveshjen e Brukselit por edhe kur bëhet fjalë për marrëveshjen për normalizimin e marrëdhënieve. Ne duam ta shohim atë të ketë ecur përpara dhe atë urgjentisht dhe mendojmë se është koha tani. Jo sepse ne po provojmë të krijojmë probleme për Kosovën por në të kundërtën”, tha ai.
Tutje Hovenier ka theksuar se, themelimi i Asociacionit është rruga e vetme për Kosovën drejt strukturave evropiane dhe euro-atlantike, transmeton Front.online
”Ne e kemi thënë shumë qartë se rruga e Kosovës për ta përmbushur vizionin e saj si një shtet i integruar plotësisht në strukturat evropiane dhe euro-atlantike bëhet vetëm përmes zbatimit të marrëveshjes bazë dhe aneksit. Dhe kjo nënkupton se detyra urgjente për Kosovës është që ta themelojë Asociacionin e Komunave me Shumicë Serbe”, u shpreh Hovenier.
