Një rritje rreth vlerave mesatare të temperaturave pritet të kemi gjatë kësaj jave, por kjo rritje e temperaturave do të pengohet shpeshherë nga vranësirat dhe rrebeshet lokale të shiut të cilat pritet të ndodhin orëve të pasdites dhe të mbrëmjes.
Rrebeshet e shiut do të jenë më të rralla dhe më të izoluara në pjesën e parë të javës kur edhe do të ndjehet më shumë rritja e temperaturave.
Nga e enjta pritet të kemi depërtim më të madh të ajrit jo-stabil që do të shkaktojë destabilizim më të fuqishëm të atmosferës. Për këtë arsye do të ketë rrebeshe më të shpeshta dhe më të fuqishme të shiut me vetëtima dhe bubullimë. Po ashtu rrebeshet e shiut do të jenë shumë të përhapura.
Në përgjithësi edhe një javë me mot të paqëndrueshëm, me intervale kohore me diell pothuajse të përditshme, por edhe me vranësira të përditshme. Rritja e temperaturave do të rris ndjenjën e zagushisë për shkak të nivelit të lartë të lagështisë relative të ajrit.
Pra, deri të ejten rrebeshet e shiut do të jenë më të rralla dhe kryesisht orëve të pasdites dhe mbrëmjes dhe atë vetëm në disa rajone.
Nga e ejta rrebeshe priten në tërë rajonin dhe do të jenë më të shpeshta që do të shkaktojnë ulje të lehta të temperaturave.
Edhe për fundjavë na pret mot i paqëndrueshëm, me intervale kohore me diell e rrebeshe të herëpashershme, lokale shiu.
