Eugen Cakolli, nga Instituti Demokratik i Kosovës, ka numëruar një varg kritikash karshi projektligjit për reformën zgjedhore.
Cakolli, këtë projektligj nuk e cilëson reformë zgjedhore, por më shumë e sheh si adresim të disa mangësive të sistemit zgjedhor, ku thotë se janë ndryshime kozmetike dhe shtyrje e interesave të partive politike.
“Duhet të fillojmë me faktin që kjo nuk është sipas vlerësimit tonë reformë zgjedhore, është më shumë adresim i disa mangësive të sistemit zgjedhor, të cilat janë ndryshime kozmetike dhe është shtyrje përpara e interesave të ngushta të partive politike për çështje të cilat janë në interesin e tyre elektoral, dhe të cilat u mundësojnë atyre përfshirje të kandidatëve të caktuar, rritje të votimit preferencial dhe ndërhyrje në punën e institucioneve të pavarura kushtetuese”, tha ai në emisionin “Ditari”.
Cakolli, tha se brenda projektligjit për reformën zgjedhore është dashur të diskutohej edhe çështja e pragut zgjedhor.
“Do të duhej të diskutohet për elementet më përmbajtjesore të sistemit zgjedhor, pra do të duhej të diskutohet çështja e pragut zgjedhor, a do të duhej të mbetej i njëjtë, apo të rikategorizohet siç e kemi pasur ne rekomandim. Duhej të diskutohej ndarja në më shumë zona zgjedhore të Kosovës, me qëllim të rritjes së nivelit të përfaqësimit dhe lidhjes sa më direkte dhe llogaridhënies mes deputetëve dhe votueseve, për shkak se aktualisht në një zonë deputetët shpesh kanë tendencë të mos jenë llogaridhënës ndaj një zone specifike edhe pse ata në praktikë e kanë se ku qëndron baza e tyre elektorale”, tha Cakolli.
Tutje, ai mangësi brenda projektligjit e ka parë edhe mënyrën e zgjedhjes së presidentit të Kosovës dhe çështjen e listave zgjedhore, shkruan Tëvë1.
“Do të duhej të kishte diskutime edhe për mënyrën e zgjedhjes së presidencës, apo presidentit të vendit, çështjen e listave zgjedhore, pra aplikimin e modelit zebër për përfaqësim gjinor, dhe çështje të tilla që njëmend e përmirësojnë sistemin zgjedhor dhe jo të fokusohemi në radhë të parë në çështje kozmike”, shtoi Cakolli.
