Më 14 qershor të vitit të kaluar, Qeveria e Kosovës kishte miratuar projektligjin për pagën minimale, i cili parashihte rritjen e pagës në 264 euro bruto, mirëpo jashtë këtij projektligji mbetën veteranët e Ushtrisë Çlirimtare të Kosovës, pasi nuk parashihej lidhja e pagës minimale me pensionin e veteranëve, shkruan InLajmi.
Si atëherë edhe sot, veteranët mbetën të pakënaqur, pasi kërkesat e tyre nuk u përfillën nga Qeveria e Kosovës, e kjo u pa edhe pas publikimit të koeficientit të ri të Ligjit të Pagave, ku rritje pagash nuk kishte për kategoritë e dala nga lufta.
Së fundi, ushtruesi i detyrës së kryetarit të Organizatës së Veteranëve, Faton Klinaku, ka bërë të ditur se paga minimale do të paraqitet në komision të mërkurën, ndërsa ka theksuar se pushteti do t’i vazhdojë përpjekjet që me përkrahjen e komisionit të hiqen veteranët nga paga minimale, por që sipas tij, kjo përpjekje nuk do të rezultojë e suksesshme, pasi nuk do ta kenë përkrahjen e gjithë komisionit. Për më tepër, ai paralajmëroi se veteranët do të jenë të gatshëm për protesta, nëse kërkesat e tyre nuk dërgohen për shqyrtim në Kuvendin e Kosovës.
“Injorimin” që Qeveria e Kosovës po ua bënë veteranëve nuk e sheh si “të rastësishëm”, ish-komandanti i UÇK-së, Zafir Berisha, i cili në një deklaratë për InLajmin, thotë se ideja kryesore e Qeverisë së Kosovës është që përmes injorimit dhe mosrritjes së pagave “të plogështojë” respektin për veteranët e luftës dhe të krijojë pakënaqësi për të arriturat e UÇK-së.
“Injorimi që po i bëhet ish-luftëtarëve të UÇK-së nga regjimi aktual nuk është i rastësishëm. Ide e regjimit është që përmes mosrritjes së pagës minimale të plogështohet respekti për ata që bënë luftën dhe të krijohet pakënaqësi me të arriturat që ka bërë UÇK-ja”, tha Berisha.
Berisha bëri thirrje që Ligji për Vetaranët të ndryshohet, pasi sipas tij, ky ligj ka stimuluar shkelje ligjore, duke i kufizuar kështu ish-ushtarët e UÇK-së që të punojnë në “të zezën” ndërsa shtoi se me kaq të hyra sa marrin ata, nuk mund të jetohet.
“Ligji për Veteranët duhet të ndryshohet sepse përmes ligjit kanë stimuluar shkelje ligjore, duke i kufizuar ish-ushtarët e UÇK-së që për 170 ero të ndihmës sociale të punojnë në të “zezë” sepse dihet që me aq te hyra nuk jetohet”, tha Berisha për InLajmin.
Kujtojmë se ministri i Financave, Hekuran Murati, pati deklaruar më herët se për veteranët do të projektohet ligji i veçantë, pasi të bëhet edhe verifikimi i listave. /InLajmi/
