Kryeministri Kurti, në një konferencë për media së bashku me senatorët amerikanë Murphy e Peters, foli për aktivietin e deritashëm të institucioneve të vendit, mes tjerash, aktivitetin e FSK-së në “Deffender Europe 2023”, por edhe bashkëpunimin e ngushtë ndërmjet Kosovës dhe SHBA-së në segmentet të ndryshme.
“Krahas marrëdhënieve dypalëshe diskutuam për zhvillimet e fundit në vend, qeverisjen tonë më shumë se 2 vjeçare, arritjet, edhe synimet tona përpara”, deklaroi kryeministri Kurti.
Ai, më tej, shtoi se është biseduar edhe për raportet me Serbinë, ku informoi për rezultatet e dialogut ndërmjet Kosovës e Serbisë, të ndërmjetësuar nga BE, me theks të veçantë marrëveshja bazike dhe aneksi i zbatimit e që, sipas Kurtit, përbëjë avancim në mes të 2 vendeve dhe janë platformë e mundësi për normalizim të plotë të tyre, prandaj, shtoi ai, na duhet zbatim i tërësishëm, shpejtë dhe pa kushtëzim të tyre.
Kurse senatori Chris Murphy tha se i vjen mirë që është këtu me senatorin Peters dhe kjo vizitë e tij njëjavore në rajon, e që nis në Kosovë, nuk është koincidencë.
Ai tha se vjen këtu, sepse SHBA-ja nuk ka mik më të madh, më të mirë që ka ndihmuar për menaxhimin e tërheqjes nga Afganistani.
Gjithashtu, ai tha se Kosova është rreshtuar e para përkrah nesh kundër agresionit rus në Ukrainë. Ai foli edhe për suksesin e Qeverisë së Kosovës në zhvillimin e Kosovës investimet e huaja dhe luftimin e korrupsionit.
Ndërkaq senatori Peters tha se jemi të inkurajuar nga marrëveshja e cila është arritur dhe zbatimi i saj është një prej çështjeve kryesore që duhet të mundësojë marrëveshjen
Ai shtoi se sa i përket lidhjes me Forcat e Armatosura nuk ka asnjë dyshim që kemi një marrëdhënie të shkëlqyeshme mes SHBA-së dhe Kosovës.
“Çfarë do incidenti ndërkombëtarë apo tjetër ku ka nevojë që aleatët të bashkohen, vendi juaj e ngrit dorën gjithmonë të bashkohet, dhe jeni ndër të parët për të punuar me Forcat e Armatosura të Shteteve të Bashkuara të Amerikës”, tha senatori Peters.
Në fund Peters tha se do të vazhdojmë ta forcojmë edhe me tej marrëdhënien me Kosovën, shkruan RTK
Më herët senatorët amerikanë, Chris Murphy dhe Gary Peters u pritën nga presidentja e vendit, Vjosa Osmani.
