Aktori Ray Stevenson ka vdekur në moshën 58-vjeçare, vetëm disa ditë para ditëlindjes së 59-të.
Stevenson ka luajur në një varg filmash aksion dhe fantazi, duke përfshirë filmat si “Punisher: War Zone”, “King Arthur” dhe serialin “Ahsoka”.
Aktori ka lindur në Lisburn, Irlandë e Veriut, më 25 maj 1964, i 2-ti nga 3 djemtë e një piloti të Forcave Ajrore Mbretërore.
Familja u transferua në Angli kur ai ishte 8 vjeç.
Si i rritur ai u regjistrua në Shkollën e Teatrit në Bristol Old Vic, ku diplomoi në moshën 29-vjeçare, shkruan Dailymail.
Pas paraqitjes si mysafir në shfaqje të ndryshme televizive dhe filma televizivë, ai bëri debutimin e tij në ekranin e madh në vitin 1998 në “Theory of Flight”, si një zhigolo, duke luajtur përballë Kenneth Branagh dhe Helena Bonham Carter.
Ai fitoi një punë të qëndrueshme më pas duke u shfaqur në seriale të ndryshme televizive britanike, transmeton Klan Kosova.
Ai në vitin 2004 luajti në King Arthur. Pas kësaj, ai filloi të fitonte më shumë pjesë aksioni, duke luajtur një ushtar trupmadh me një zemër të artë në mini-serialin fitues të Emmy-t “Roma”, dhe më vonë si hero aksioni Frank Castle në “The Punisher”.
