Diabeti është një sëmundje kronike që shfaqet kur pankreasi nuk prodhon sasi të mjaftueshme të insulinës ose kur trupi nuk mund ta shfrytëzojë në mënyrë efikase insulinën e prodhuar nga pankreasi, shkruan InLajmi.
Numri i personave me diabet rritet nga viti në vit ndërsa pacientët e varur nga insulina ende detyrohen t’i blejnë shiritat për glikemi ndërsa ka edhe të tjerë që trajtohen me medikamente të tjera, që nuk janë përdorues të insulinës.
Vitet e mëparshme shpesh është paraqitur mungesa e dozave të insulinave, por arsyeja ishte vonesa në shpalljen e tenderëve ndërsa vonesat e furnizimit i kanë mbuluar vetë personat e sëmurë me diabet. Por, kohëve të fundit duket se sigurimi i insulinave ka marrë një kahje tjetër, duke u angazhuar maksimalisht për sigurimin e tyre, gjë që paraqet një impakt pozitiv për personat e prekur nga diabeti.
Nuk është i vogël numri i personave që kanë nevojë për marrjen e insulinës, ndërsa Ministria e Shëndetësisë bën të ditur se aktualisht 15.000 persona të prekur nga diabeti janë të varur nga insulina ndërsa thekson se ka edhe të tjerë që nuk janë përdorues të insulinës, por që trajtohen me medikamente të tjera.
“Numri i të prekurve nga diabeti që marrin insulinë është rreth 15.000. Por, ka edhe të tjerë që janë të prekur nga diabeti, por të cilët trajtohen me medikamente të tjera dhe nuk janë përdorues të insulinës”, thuhet në përgjigjen me shkrim të MSH-së për InLajmin.
Sigurimin e insulinave nga viti në vit e bën Ministria e Shëndetësisë, por ka pasur raste nga e kaluara, kur kjo ministri nuk ka mundur të sigurojë numër të mjaftueshëm të insulinave dhe si pasojë pacientët janë përballur me mungesë dhe sfida nga më të ndryshmet për sigurimin e tyre.
Këtë vit, zyrtarë nga Ministria e Shëndetësisë theksojnë se kontrata në shfrytëzim për sigurimin e insulinave kap vlerën e 1.7 milionë eurove.
“Kontrata në shfrytëzim ka vlerën prej rreth 1.7 milion euro, ndërsa buxheti i përgjithshëm për barna për sivjet (ky hyn edhe buxheti i dedikuar për insulina) është rreth 60 milionë euro”, bëjnë të ditur nga Ministria e Shëndetësisë”.
Ministria e Shëndetësisë çdo vit buxhetin e klasifikon për 2 lote të tenderit. Këtë vit zyrtarë nga Ministria e Shëndetësisë thonë se kontrata për furnizimin me insulina përfshin 79.375 insulina për LOT 1 ndërsa 341.395 insulina për LOT 2.
“MSH aktualisht furnizohet me insulina nga kontrata me Nr. 206-22-14292-1-1-5/C261 me titull “Furnizim emergjent me Insulina Analoge nga Lista Esenciale” LOT 1 dhe 2. Kontrata është valide dhe furnizimet janë te rregullta. Lot 1: Sasia e insulinave: 79.375. Lot 2 Sasia: 341.395”, sqarojnë nga MSH.
Ndryshe, sot në Evropë një në 11 persona vuajnë nga diabeti. Kjo sëmundje është një ndër shkaktarët kryesor të problemeve kardiovaskulare në popullatë dhe numrit të lartë të vdekjeve. /InLajmi/
