23 prilli i këtij viti shënon datën e zgjedhjeve në komunat veriore të Kosovës, zgjedhje këto që u bojkotuan nga serbet ndërsa mandatin e morën kryetarët e ri që nuk i përkisnin këtij komuniteti, shkruan InLajmi.
Pas më shumë se 3 javësh nga fitorja në zgjedhjet e 23 prillit, për të parin e Komunës së Mitrovicës së Veriut u organizua ceremonia e betimit nën masa sigurie, ku kandidati i Lëvizjes Vetëvendosje Erden Atiq të premten bëri betimin për udhëheqjen e kësaj komune.
Paraprakisht në ndërtesën e komunës u vendos edhe flamuri i Republikës së Kosovës, ndërsa këto veprime u kritikuan ashpër nga Lista Serbe dhe të tjerë zyrtarë serbë, të cilët e quajtën represion dhe “okupim” të veriut.
Me gjithë pritjet se gjatë inaugurimit të mandatit të kryetarit Atiq, situata mund të eskalojë, por për ruajtjen e rendit dhe qetësisë në veri ishin angazhuar pjestarët e Policisë së Kosovës në bashkëveprim edhe me institucionet e sigurisë ndërkombëtare që veprojnë në Kosovë.
Ndonëse gjatë ceremonisë së betimit nuk u shënua as edhe një incident, nuk mund të jemi të qetë aq sa të besojmë se kjo qetësi do të vazhdojë, sidomos pasi zyrtarët serbë nga Kosova dhe Serbia deklarativisht paralajmëruan se nuk do të rrijnë ”duarkryq” ndaj represionit që po ushtron kryeministri Albin Kurti ndaj komunitetit serb atje. Madje theksuan se shumë shpejt do të pasojë kundërpërgjigja serbe ndaj “pushtimit” të veriut nga Albin Kurti.
Madje nënkryetari i Listës Serbe, Igor Simiq, duke reaguar ndaj ngjarjeve në veri i ka bërë thirrje kryeministrit Kurti që deri më një qershor të ndalojë veprimet e represionit ndaj serbëve, përndryshe do të ketë kundërpërgjigje aktive.
U paralajmërua se gjatë betimit të kryetarit në Mitrovicën e Veriut, mund të ketë veprime të stuhishme që do ta tensionojnë situatën në veriu, një reagim i tillë nuk u pa, por nuk duhet të sigurohemi që në ditët në vijim të mos kemi veprime që mund të sjellin trazira atje.
Gjithashtu mbetet për t’u parë nëse qeverisja lokale do të jetë efikase dhe të funksionojë normalisht, ndërsa zgjedhja e kryetarëve ka qenë legale por legjitimiteti i tyre është i munguar.
Nuk shprehet optimist se qeverisja lokale në komunat e veriut do të funksionojë normalisht, nënkryetari i LDK-së, Lutfi Haziri, pasi thotë se procesi i zgjedhjes së kryetarëve nuk ka legjitimitet.
Nënkryetari i LDK-së Lutfi Haziri për InLajmin tha se kjo formë e qeverisjes lokale do të jetë e vështirë në këto rrethana, mirëpo shtoi se të gjithë presin që kryetarët e betuar të fillojnë punën e t’i organizojnë shërbimet ditore e esenciale për qytetarët.
“Do të jetë e vështirë ta mendojmë një qeverisje normale në këto rrethana dhe me këtë proces zgjedhor që është legal por legjitimiteti i mungon. Tani gjithë presim që me fillimin e punës kryetarët e betuar t’i organizojnë shërbimet ditore dhe shërbimet tjera esenciale për qytetarët në mënyrë që mos të kemi vakum institucional dhe proces të rizgjedhor”, tha Haziri për InLajmin.
Ndërsa sa i përket deklarimeve të Listës Serbe se do të ketë veprime ndaj “pushtimit” dhe represionit në veri, Haziri tha se këto deklarime nuk do të sjellin veprime, por vetë deklarime që nxitin intensifikimin e bisedimeve në dialog.
“Nuk do sjellë zhvillime të tjera pos intensifikim të dialogut në Bruksel, kjo do jetë e gjitha, të tjera deklarime do të jenë më shumë presion publik dhe reagime publike. Gjithashtu duhet që me urgjencë të trajtohet kërkesa e shteteve të QUINT-it dhe komunitetit ndërkombëtar që dialogu të ketë një dinamikë të re”, deklaroi Haziri.
Ndryshe, kujtojmë se pas betimit të kryetarit të Mitrovicës së Veriut, Erden Atiq dhe vendosjes së flamurit të Kosovës në godinën e komunës, ka reaguar edhe president i Serbisë Aleksandër Vuçiq, i cili ka telefonuar emisarin e BE-së Miroslav Lajçak, për ta njoftuar për veprimet e Albin Kurtit në veri të Kosovës. Libona Gegaj /InLajmi/
