Ndërrimi i emrit të UP-së është një propozim që e ka dhënë rektori i këtij universiteti, Qerim Qerimi. Sipas tij, arsyeja e ndërrimit është për shkak të ngatërrimit të emrit në arenën ndërkombëtare.
“Po e shqyrtojmë rikthimin e emrit origjinal që ka pasur përpara ndryshimit të fundit të statutit, pra Universiteti i Prishtinës. Është edhe një universitet në Mitrovicë, në gjuhën serbe, që po ashtu e pretendon emrin Universiteti i Prishtinës dhe kjo ka krijuar konfuzion”, kishte thënë rektori për media.
Mirëpo kundër këtij propozimi ka dalë një organizatë studentore. Kryetari i “Unionit Demokratik”, Arbër Gecaj i cili ka thënë se deri tani janë mbledhur 4.000 nënshkrime nga studentët në 4 fakultete të UP-së.
Gecaj tha se nuk përjashtojnë mundësinë e protestave dhe bojkotit “nëse tentohet të jetësohet” propozimi i rektorit Qerimi.
“Ne patjetër që jemi kundër largimit të emrit të Hasan Prishtinës nga Universiteti i Prishtinës. Fillimisht është fyerje që emri i një figure të tillë që ka kontribuar shumë edhe për arsimin shqip, të shihet si pengesë për universitetin. Gjithashtu arsyetimet se kinse po kemi probleme në arenën ndërkombëtare për shkak të emrit janë të pavërteta dhe qëllimkeqe. Ne kemi dërguar shkresë zyrtare në adresë të rektorit të UP-së për ta kundërshtuar këtë veprim, gjithashtu javën që lamë pas kemi realizuar një aksion simbolik para rektoratit. Këtë javë kemi filluar me peticion në disa fakultetet e UP-së. Gjithashtu javën tjetër vazhdojmë edhe në disa fakultete tjera. Deri tani në vetëm 4 fakultete kanë nënshkruar afër 4 mijë studentë, si kundërshtim i largimit të emrit të Hasan Prishtinës nga Universiteti i Prishtinës. Ne do ta dorëzojmë në fund në rektoratin e UP-së, por nuk përjashtojmë mundësinë e protestave dhe bojkotit në rast se tentohet të jetësohet ky propozim”, tha Gecaj
Për këtë propozim pati shumë reagime, madje për ta kundërshtuar, në fillim të muajit maj është zhvilluar një aksion simbolik para rektoratit. Ky aksion u organizua nga fondacioni “Hasan Prishtina” në bashkëpunim me disa shoqata tjera.
Në këtë aksion kishte marrë pjesë edhe profesori Bujar Dugolli. Ai tha se figura e Hasan Prishtinës është një figurë e ndritur që nuk ka mundur ta kontestojë askush.
“Nuk mund të largohen emrat e patriotëve e intelektualëve, që tërë jetën e kanë shkrirë për atdheun”, tha ai për Express
Për nismën e rektorit Qerimi, kishte reaguar edhe politologu Bardhyl Mahmuti. Ai ka thënë se përpjekja për ndërrimin e emrit është absurdi më i madh.
