Instituti Demokratik i Kosovës vlerëson se mungesa e kuorumit në seancat e Kuvendit të Kosovës vazhdon të jetë një problematikë që po e pengon përmbushjen e funksionit të këtij institucioni.
KDI-ja nëpërmjet një analize thotë se ky problem, po e stërngarkon agjendën e Kuvendit, pasi pikat të cilat nuk po arrijnë të miratohen në një seancë po barten në seanca tjera. Për pasojë, jo rrallëherë rendi i ditës së një seance të vetme përmban 30 deri 60 pika për shqyrtim.
“Vetëm gjatë sesionit pranveror të këtij viti, 3 seanca janë ndërprerë për shkak të mungesës së kuorumit, ndërsa nuk ka pasur kuorum për votim në 7 seanca. Nga praktika e ndërprerjes së seancave, tash e 2 javë Kuvendi ka shkuar një hap tutje duke mos organizuar fare seanca për shkak të mungesës së kuorumit”, thuhet në analizën e tyre.
Tutje vlerësohet se kryparlamentari, Glauk Konjufca dhe Kryesia e Kuvendit duhet të aplikojnë në mënyrë të rregullt ndëshkimet sipas legjislacionit në fuqi për deputetët të cilët nuk marrin pjesë në punimet e Kuvendit, shkruan Klan Kosova.
“Ligji për të drejtat dhe përgjegjësitë e deputetit si dhe Rregullorja e Kuvendit, parasheh që një deputet e humb mandatin vetëm nëse mungon 6 muaj rresht në seancat e Kuvendit. Po ky ligj përcakton ndalesë të kompensimit për deputetët që nuk marrin pjesë në seanca apo komisione për shkaqe të paarsyeshme. Tutje aty thuhet që “Deputeti është i detyruar të marrë pjesë në seancat plenare dhe në mbledhjet e organeve ndihmëse të Kuvendit, në të cilat ai është anëtar dhe nëse ai për një arsye nuk mund të marrë pjesë, duhet të njoftojë me kohë kryetarin e Kuvendit dhe të prezantojë arsyet e mungesave. Mëditja për pjesëmarrje në seancë është 200 euro” thuhet mes tjerash në analizën e tyre.
