Disa qytetarë serbë nga Kosova janë nisur në këmbë për të marrë pjesë në mitingun e Partisë Progresive Serbe të planifikuar për më 26 maj në Beograd nga presidenti i Serbisë, Aleksandar Vuçiq, transmeton InLajmi.
Kështu 13 të rinj të kombësisë serbe në mëngjesin e së mërkurës janë nisur nga Kosova për në Beograd në këmbë, për të marrë pjesë në mbledhjen e Partisë Progresive Serbe të paralajmëruar nga presidenti i Serbisë, Aleksandar Vuçiq, për më 26 maj në Beograd.
Të rinjtë janë nga fshatrat Kusica e Lartë, Ranillug, Rapotova e Madhe Kamenica dhe Draganaci.
Ata deklaruan se udhëtimin e kanë nisur me iniciativë të tyre me qëllim që t’i japin mbështetje presidentit Vuçiq në mitingun e madh që do të mbahet javën e ardhshme.
Ata theksuan se dëshirojnë ta falënderojnë presidentin Vuçiq për përpjekjet që investon në ruajtjen e identitetit serb në Kosovë dhe për të mbështetur të gjitha aktivitetet e mëtutjeshme që do të kontribuojnë në përparimin e popullit serb në këto zona.
Rruga nga fshati Korminjanë, nga ku kanë nisur, deri në Beograd është 470 kilometra dhe plani i tyre është që të përshkojnë rreth 40 kilometra në ditë, me akomodim gjatë natës. Ato shoqërohen edhe nga një automjet me një gardërobë për ndërrimin e rrobave dhe furnizimet e nevojshme me ujë.
Grupi i 2-të nga komunat të cilat ndodhen në pjesën veriore të Kosovës. Mëngjesin e së mërkurës 23 qytetarë janë mbledhur në kishën e Shën Vasilij Ostroskit në Leposaviq, nga ku edhe janë nisur në këmbë për në kryeqytet. Të rinjët bartin flamuj të Serbisë dhe janë të veshur me bluza me mbishkrimin “Për Serbinë, për Vuçiqin, serbët e Kosovës ”, si dhe mbajnë një shkop me të njëjtin tekst.
Ata kaluan Jarinjen rreth orës 10:30 dhe nga ai vend njoftuan se ishin në rrugë për mbijetesën e popullit serb në Kosovë, shkruan RTV Plus.
Kujtojmë se e njëjta praktikë ishte edhe në vitin 2019, kur një grup i serbëve të Kosovës dolën në këmbë në tubimin “Për Ardhmërinë e Serbisë” të organizuar nga SNS më 19 prill. Parulla e SNS ka ndryshuar, por slogani i serbëve nga Kosova ka mbetur i njëjtë. /InLajmi/
