Deputeti i Lidhjes Demokratike të Kosovës, Avdullah Hoti, po merr pjesë në Samitin e Demokracisë në Kopenhagë me ftesë të ish-sekretarit të NATO-së, Anders Fogh Rasmussen, përcjell InLajmi.
Ky samit është organizuar për të diskutuar veprimet e përbashkëta për tu përballur me sulmet ndaj demokracisë.
Hoti thekson se Kosova është e bekuar që është pjesë e demokracive perëndimore ndërsa shton se partnerët tanë ndërkombëtarë na kanë ndihmuar që të ndërtojmë shtetin e pavarur gjersa sot janë krah nesh në forcimin e demokracisë.
Sipas Hotit, Kosova duhet të jetë aktivisht në krah të demokracive perëndimore në mbrojtje të vlerave perëndimore të lirisë e demokracisë.
Postimi i plotë i tij:
Me ftesë të ish-Sekretarit të NATO-s, Anders Fogh Rasmussen, i cili është Kryetar i Fondacionit të Aleancës së Demokracive, po marr pjesë në Samitin e Demokracisë të Kopenhagës. Kjo është një ngjarje vjetore që është themeluar pesë vite më parë, me Joe Biden si folësi kryesor i samitit të parë.
Ky samit është organizuar për të diskutuar veprimet e përbashkëta për tu përballur me sulmet ndaj demokracisë. Ndër folësit kryesorë ishin Sekretari i NATO-s, Jens Stoltenberg, Kryeministrja e Estonisë, Kaja Kallas, Presienti i Ukrainës, Volodymyr Zelenskyy, Liderja e opozitës së Bjellorusisë, Sviatlana Tsikhanouskaya, Ministri i Jashtëm i Danimarkës, Lars Rasumssen, Presidenti i Çekisë, Petr Pavel, ish Kryeminsitrja Britanike, Liz Truss, Presidenti i Institutit Nacional Demokratik nga SHBA, Derek Mitchell, ish Kryesuesja e Kongresit të SHBA-së, Nensi Pelosi, ish Sekretarja e Shtetit, Condoleezza Rice, Presidenti i SCSP, Ylli Bajraktari, dhe shumë përfaqësues të tjerë nga biznesi dhe fusha akademike nga e mbarë bota.
Kosova është e bekuar që është pjesë e demokracive perëndimore. Partnerët tanë na kanë ndihmuar të ndërtojmë shtetin e pavarur dhe tani janë krah nesh në forcimin e demokracisë. Kosova ka bërë progres në ndërtimin e demokracisë, e cila duhet të kurorëzohet sa më parë me integrim në BE dhe NATO.
Kosova duhet të jetë aktivisht në krah të demokracive perëndimore në mbrojtje të vlerave perëndimore të lirisë e demokracisë, në veçanti tani kur këto vlera po sulmohen nga vende diktatoriale, autokrate e moniste. /InLajmi/
