”Kosova ka orientim drejt Evropës”, ka thënë eurodeputeti austriak, Lukas Mandl, teksa në Prishtinë po mbahet ceremonia e Themelimit të Shoqatës së Miqësisë Austriako-Kosovare.
Në këtë ngjarje po merr pjesë presidentja, Vjosa Osmani, kryeministri, Albin Kurti, akterë të tjerë politikë, ambasadorë të huaj, deputetë austriakë e përfaqësues të shteteve tjera.
Teksa po mbahet kjo ngjarje, eurodeputeti austriak tha se populli i Kosovës ka orientim drejt Evropës.
Mandl po ashtu falënderoi shoqërinë civile, që sipas tij ka kontribuuar në marrëdhëniet mes 2 shteteve derisa potencoi se të gjithë duhet të punojnë më shumë për qytetarët.
Ndërkaq, presidentja e Kosovës, Vjosa Osmani, e falënderoi Austrinë për gjithçka që ka bërë për Kosovën.
“Shteti i Kosovës është bërë edhe në sajë te ndihmës dhe përkrahjes së pakusht nga miqtë e saj sikurse edhe Austria. Në një kohë kur kontinenti ynë po përballet me rreziqe të shumta nga sistemet hegjemoniste është e rëndësishme që shtetet tona të forcojnë lidhjet. Bashkëpunimi i ndërsjellë ekonomik shërben si bazë për miqësitë afatgjate. Miqësia e Kosovës me Austrinë është sa e vjetër, aq edhe e çmueshme. Austria është shteti mik që na k dal në ndihmë vazhdimisht ndaj themelimi i shoqatës së miqësisë është një domosdoshmëri”, ka thënë Osmani për Gazeta Express.
Në këtë ngjarje ka folur dhe kryeministri, Albin Kurti, duke shprehur mirënjohje për Austrinë për investimet në Kosovë.
