“Takimi i parë i Komitetit për zbatimin e Marrëveshjes për Personat e Pagjetur duhet të realizohet brenda 60 ditëve”, por për Bajram Çerkinaj këto janë veç fjalë dhe sipas tij nuk do të ndodhë më asgjë e re në lidhje me këtë çështje.
Çerkinaj nga Qendra burimore për persona të zhdukur komentoi edhe takimin e djeshëm mes Bislimit dhe Petkoviqit ku tha se takime pa rezultate do të ketë edhe në të ardhmen dhe sipas tij, nuk duhet çuditur fare.
“Ata kanë me shty takim pas takimi, edhe pse dje janë takuar që të merren vesh për disa pika të cilat janë të caktuara dhe mos të shtyhen më, pala kosovare thanë që nuk ka kurrëfarë marrëveshje sepse pala serbe po e dëshiron vetëm Asociacionin”, tha Çerkinaj.
Çerkinaj thotë se krejt çka po ndodhë në këtë proces është politike, teksa kritikoi Kurtin dhe Bislimin për mos-dhënien e informacioneve të sakta në lidhje me Deklaratën për personat e zhdukur.
“As atëherë nuk e patën të qartë, as dje dhe as në të ardhmen nuk do ta kenë të qartë çka po dojnë të bëjnë, lëre më të na japin neve ndonjë informacion të saktë. Nuk kanë asgjë të saktë, krejt i kanë politike dhe të mjegulluar”, thotë Çerkinaj.
Çerkinaj thotë se pala kosovare nuk është duke punuar asgjë, kështu thotë se ndodhi edhe në takimin e Ohrit, që sipas tij nuk kishte asgjë konkrete. Çerkinaj kritikon në masë të madhe palën kosovare, ku thotë se s’po merr hapa të duhur për personat e zhdukur gjatë luftës.
“Edhe në Ohër kur e kishin takimin, të gjithë më thanë që “ti s’po beson asgjë”, por ku të besoj unë kur ata nuk janë duke punuar asgjë konkretisht. Pala kosovare e ka humbur qysh moti hapin, për këtë nuk e shoh asnjërën palë që do të marrë ndonjë hap konkret në lidhje me këtë çështje”, tha Çerkinaj
Ndërsa, ditën e djeshme Bislimi duke folur për takimin tha se u prezantua një dokument nga emisari Lajçak, për të cilin pala kosovare ka pasur vërejtje.
“Kemi bërë propozimet në këtë draft-dokument të z. Lajcak ku kemi zgjeruar domeinin dhe kemi dashur të sigurohemi që secili nen i Marrëveshjes Bazike është i përfaqësuar në aktivitetin e zbatimin e tij. Pala serbe nuk ka dërgu ndonjë propozim por ka thënë se ne na intereson vetëm pjesa e Asociacionit e pastaj do të flasim për pjesën tjetër. Mirëpo nuk ka patur gatishmëri nga pala serbe që sot të diskutohet në mënyrë që bashkarisht të dilet me një plan të zbatimit”, ka deklaruar Bislimi. Në këtë dokument sipas Bislimit thuhet se takimi i parë i Komitetit për zbatimin e Marrëveshjes për Personat e Pagjetur duhet të realizohet brenda 60 ditëve, shkruan GazetaBlic
“Mendoj që Grupi Monitorues nuk mund të takohet pa u dakorduar për termat e referencës. Kjo vlen edhe për Grupin Punues, apo Komitetin e Përbashkët për Personat e Pagjetur. Në draftin e dërguar nga z. Lajcak thuhet që takimi i parë i Komitetit të Përbashkët për zbatimin e Marrëveshjes për Personat e Pagjetur duhet të realizohet brenda 60 ditëve, që nënkupton jo më larg se fillim apo mesi i muajit korrik. Tash data 28 maj për ne nuk përbën kurrfarë date për të cilën duhet të brengosemi, për arsye se kemi pas një proces demokratik dhe është shumë normale që ky proces demokratik të finalizohet me aktin e emërimit dhe dhënies së betimit nga kryetarët aktual”, ka deklaruar Bislimi.
