Rezultatet jozyrtare të zgjedhjeve parlamentare të 14 majit kanë zbuluar se Aleanca Popullore e udhëhequr nga partia e presidentit Erdogan Drejtësi dhe Zhvillim, siguroi 321 ligjvënës përballë Aleancës Kombëtare të opozitës, që siguroi 213.
Konkretisht, sipas raportimeve të mediave turke, partia e Erdogan, AKP, mori 266 vende, ndërsa partitë aleate të saj, Lëvizja Nacionaliste MHP, Partia e Re e Mirëqenies YRP dhe Unioni i Madh Partiak morën së bashku 55 nga 600 vende që ka Parlamenti turk.
Ndërkohë, 4 kandidatë të Partisë Demokratike të Majtë dhe asaj Partia për Kauzën e Lirisë, që mbështesin aleancën e Erdogan, u përfshinë në listën e partisë së kreut të shtetit dhe u zgjodhën si deputetë.
Nga ana tjetër, Aleanca Kombëtare, e formuar nga partia kryesore e opozitës Partia Popullore Republikane CHP, mori në tërësi 213 mandate, me subjektin politik të Kemal Kiliçdaroglu që siguroi pjesën dërrmuese, 169 mandate.
Përpara mbajtjes së zgjedhjeve, Aleanca Kombëtare ishte zotuar se do të aplikonte një “sistem parlamentar të përforcuar”, por tani duket se ata nuk do të jenë në gjendje të sigurojnë 360 mandatet e duhura për të mbajtur referendumin e nevojshëm, për t’i dhënë fund presidencës me pushtet ekzekutiv.
Ndërkohë, anëtarët e kabinetit qeveritar të emëruar nga partia e Erdogan në 16 zona elektorale, 15 prej të cilave metropolitane, do të jenë në Parlament gjatë legjislaturës së 28-të, transmeton Euronews.al
Ndërsa në provincat juglindore të prekura nga tërmetet e muajit shkurt, 2 ministra të kabinetit presidencial u zgjodhën për të qenë pjesë e Parlamentit.
