Dokumentari i Antoneta Kastratit “Dasmat dhe pampersat” ka bërë hapjen e edicionit të tretë të festivalit “Kino Kosova” në kinemanë “Riffraff “në Cyrih
Dashamirët shqiptaro-zviceranë të filmit patën mundësinë që të hyjnë në familjet kosovare në vitin 2007, kur ishte realizuar dokumentari, i cili trajtonte martesat e 4 çifteve nga rajone dhe gjenerata të ndryshme. Ata tregojnë se si i kryejnë punët e shtëpisë, si i rrisin fëmijët, për liritë dhe problemet që ballafaqoheshin në atë kohë.
Para shikuesve është paraqitur edhe regjisorja e këtij dokumentari, Antoneta Kastrati, e cila kishte ardhur enkas nga Prishtina.
Edicionin e sivjetmë të festivalit zyrtarisht e shpallën të hapur Sabahet Meta, drejtor i festivalit “Kino Kosova”, Ilir Hasanaj, udhëheqës i programit, Jonas Beer, drejtor menaxhues dhe Lida Gunst, përgjegjëse për komunikim.
Regjisori zviceran-kosovar, Ilir Hasanaj, dokumentarët e të cilit shfaqen dhe shpërblehen në festivale ndërkombëtare, ka treguar se si ka bërë përzgjedhjen e filmave të programit të sivjetmë për Kino Kosovën.
“Filmat e këtij viti sjellin histori të vërteta dhe të sinqerta nga Kosova”, tha, mes tjerash, Hasanaj, shkruan Albinfo.ch.
Pas dokumentarit “Dasmat dhe pampersat” është shfaqur dokumentari tjetër, “Përtej territ”, i regjisores Donjeta Mejtani, i cili vjen si një thirrje për ndërgjegjësim për dhunën në familje në Kosovë, e në të njëjtën kohë, synon edhe nxitjen e grave për t’i raportuar rastet e dhunës.
