Analisti, Visar Xani tha se nëse kryeministri i Kosovës, Albin Kurti e shtynë përpara idenë e tij për modelin kroat të statutit të Asociacionit, do të ketë edhe propozimin tjetër nga Serbia ose Grupi Menaxhues, ku pastaj sipas tij, do të ketë kompromis të dy këtyre qëndrimeve.
Xani, ka konsideruar se nuk është rruga më e mirë kjo, pasi që sipas tij, i gjithë procesi është i vizatuar në marrëveshjet e arritura në Bruksel.
“Kryeministri Kurti nëse e shtynë idenë e tij përpara për propozimin kroat, do të kemi edhe propozimin tjetër nga Serbia ose nga Grupi Menaxhues, dhe pastaj do të kemi kompromis të këtyre 2 qëndrimeve. Unë nuk konsideroj që është rruga më e mira aty, për shkak që i gjithë vizioni, i gjithë procesi është i vizatuar në marrëveshjet e arritura në Bruksel, është e përcaktuar edhe me Kushtetutë të Republikës së Kosovës, dhe çdo ide tjetër për të shtruar në tavolinë, për të diskutuar prej pikës zero konsideroj që është humbje në kohë, është edhe një mundësi për hapje të diskutimit për themelimin e Asociacionit dhe kjo nuk e di se ku do të ndalet”, tha Xani në emisionin “Ditari”.
Sipas tij, përafrimi për themelimin e Asociacionit duhet të ndihet sipas marrëveshjeve në Bruksel dhe sipas vendimit të Gjykatës Kushtetuese.
“Përafrimi i rrugës për themelimin e Asociacionit duhet të ndiqet qartë, duhet të ndiqet sipas marrëveshjeve të Brukselit, sipas vendimit të Gjykatës Kushtetuese, dhe nëse e përafrojmë këtë rrugë dhe Grupi Menaxhues, a do të gjendet një zgjedhje tjetër për Grupin Menaxhues a do të themelohet një grup tjetër, apo grupi i njëjtë, të draftojë draft-propozimin sipas marrëveshjes së Brukselit, sipas ligjeve të Kosovës, sipas Kushtetutës”, tha ai.
Xani tha se nëse do të ketë 2 dokumente ekstremist të kundërta, atëherë edhe mesi do të ishte jo në frymën kushtetuese.
“Aty për aty do të kenë mundësi çdo palë të jep komentet, sugjerimet dhe të reflektohen shumë ma lehtë në atë dokument. Por, që kemi 2 dokumente ekstremist të kundërta, atëherë edhe mesi do të ishte ndoshta jo në frymën kushtetuese”, shtoi ai, shkruan Tëvë1.
Në takimin e 2 majit mes kryeministrit të Kosovës, Albin Kurti dhe presidentit të Serbisë, Aleksandar Vuçiq, Ekipi Menaxhues ka propozuar një draft-statut për Asociacionin e komunave me shumicë serbe, i cili është kundërshtuar nga pala kosovare. Ndërkohë që edhe kryeministri Kurti ka paraqitur një draft-vizion, i cili ka thënë se përngjan me atë kroat.
