Personat me nevoja të posaçme paralajmërojnë protesta masive në fillim të muajit qershor përmes të cilave do të kërkojnë, siç thonë, të mund t’i gëzojnë të drejtat që u takojnë. Të revoltuar nga rritja e pagave të funksionarëve ata thonë se për gjithçka shteti siguron para, vetëm për përmirësimin e kushteve të tyre, buxheti shtetëror është i kufizuar.
“Kërkesat tona janë konkretisht që shtesa për personat me nevoja të posaçme si për të rriturit ashtu dhe për fëmijët të pësojë rritje prej 78%. Kërkojmë mbulim prej 78% të asistentëve arsimorë në të gjitha shkollat e vendit për fëmijët me nevoja të posaçme. Kërkojmë po ashtu që shfrytëzimi i asistentëve nga 80 orë në bazë mujorë të rritet në 160 orë sepse 80 orë nuk i plotëson nevojat. Të gjitha pajisjet ndihmëse ortopedike siç janë shtagat për të verbrit, matësit e sheqerit, matësit e temperaturës dhe për shtypje të jenë në kurriz të Fondit”, deklaroi Suaret Alishan, Koalicioni “ Ndryshojmë”.
Alishan nga koalicioni “Ndryshojmë” tha se rritja e çmimeve ka dëmtuar tej mase këtë kategori të qytetarëve. Shtojnë se gjendjen edhe më shumë e rëndon ndalimi i shtesave financiare shtetërore të cilat atyre iu janë premtuar, shkruan AlsatM
“ Është e pa lejueshme që ministri të thotë se shtesa për personat me nevoja të posaçme është rritur për 14,9% kjo shtesë është si pasojë e inflacionit të cilën shteti e përjetoi. Për shkak të inflacionit kemi 14,9% rritje, me të cilat nuk mbulohet asnjë shpenzim. Nëse vitin e shkuar kemi paguar 600 denarë rrymë, këtë vit paguajmë 1300. Ne nuk morëm ndihmë shtetërore edhe pse ministria tha se do marrim deri në fund të krizës”, u shpreh Suaret Alishan, Koalicioni “ Ndryshojmë”.
