Kryeministri i vendit, Albin Kurti, ka marrë pjesë në përurimin e impiantit të 3 të ujërave të ndotura në 2 vitet e fundit, përcjell InLajmi
Kurti tha se bashkë me institucione ndërkombëtare, po synojnë që brenda pesë viteve të ardhshme, shtatë kryeqendrat të kenë impiantet e tyre, ndërkohë që sipas tij, për 2 vjet kanë siguruar mbi 100 milionë euro grante për trajtimin e ujërave të zeza dhe menaxhimin e mbeturinave.
Ai shtoi se pa nga afër edhe hapësirat e reja, teknologjinë e impiantit dhe procesin e punës, nga ndarja mekanike tek ajo biologjike e deri te trajtimi me rreze ultraviolet, për ta dëshmuar sipas tij, me sy transformimin e ujit të ndotur në atë të pastër që kthehet në lumin Erenik.
Postimi i plotë i tij:
Nga takimi i hershëm në Kryeministri me z. Lajçak, drejt në Gjakovë, për të përuruar impiantin e tretë të ujërave të ndotura, në dy vitet të fundit.
Impianti i ri në Gjakovë, vjen pas atyre në Prizren dhe Pejë, e po i paraprinë atyre në Gjilan, Mitrovicë, Ferizaj dhe Prishtinë. Së bashku me institucione ndërkombëtare partnere, po synojmë që brenda pesë viteve të ardhshme, të gjitha shtatë kryeqendrat të kenë impiantet e tyre, ndërkohë që për vetëm dy vite kemi siguruar mbi 100 milionë euro grante për trajtimin e ujërave të zeza dhe menaxhimin e mbeturinave.
Nga gjithsej 16.8 milionë euro sa ka kushtuar ky projekt kaq i rëndësishëm, 6 milionë euro kanë qenë kontribut i Bankës Zhvillimore gjermane (KfË), 7.6 milionë nga Qeveria zvicerane dhe 3.2 milionë tjera i ka shtuar Komuna e Gjakovës.
Nën shoqërimin e punëtorëve të KRU Gjakovës, që këtë vit shënon 40-vjetorin e saj, pata kënaqësinë që të shoh nga afër hapësirat e reja, teknologjinë e impiantit dhe procesin e punës, nga ndarja mekanike tek ajo biologjike e deri te trajtimi me rreze ultraviolet, për ta dëshmuar me sy transformimin e ujit të ndotur në atë të pastër që kthehet në lumin Erenik.
Sot bëmë edhe një hap më tutje për mbrojtjen e mjedisit tonë. /InLajmi/
