Deputetja e Lidhjes Demokratike të Kosovës Doarsa Kica-Xhelili, i ka reaguar kryeministrit Albin Kurti, kur ky i fundit tha se nuk ka asnjë të punësuar me mbiemrin e tij në ndonjë ministri, përcjell InLajmi.
Kica-Xhelili reaguar duke thënë se rehatimi i mbështetësve dhe përfshirja e tyre në afera milionëshe amnistohet pasi që nuk e kanë mbiemrin Kurti.
Tutje, ajo ka pyetur kryeministrin Kurti se ku e ka familjen, gruan e vajzën, se ku i arsimon e shëron.
Postimi i plotë i saj:
Kryeministri Kurti u pyet nëse ka opinion që mbështetësi i tij u zgjodh drejtor në RTK.
Ai u përgjigj që mbase është i vetmi kryeministër që nuk ka asnjë me mbiemër të njëjtë të punësuar në ndonjë ministri.
Seriozisht? A mund ta imagjinoni? A mund ta analizoni si përgjigje? Domethënë, sipas tij, rehatimi i mbështetësve, bashkëpartiakëve, donatorëve të VV, madje edhe përfshirja e tyre në afera potenciale milionëshe në sektorin energjetik dhe jo vetëm, AMNISTOHET, sepse nuk e paskan mbiemrin Kurti.
Kjo të detyron të dalësh nga vetja, e ta pyesësh:
E në Mal të Zi, kryeministër, a ke? Apo Norvegji?
Shtëpinë ku e ke? Më të rëndësishmen, familjen, gruan e vajzën, ku? Ku i arsimon? Ku i shëron? A ballafaqohet vajza jote në shkollë me bullizimin që fëmijët e politikanëve në Kosovë i kanë duruar deri në vaj depresiv për shkak të diskursit tënd kur ti i shpallje tradhëtarë? Varret e gjyshërve e babgjyshërve, dhimbjen e familjarëve të vrarë me mbiemrin tënd, a e ke?
Mos, kryeministër! Je mjaftueshëm inteligjent për të kuptuar që po ofendon përtej asaj që e duron kjo shoqëri, që nënkupton se po e bën qëllimshëm. Po abuzon qëllimshëm. Kjo është brutalisht e pafalshme. /InLajmi/
