Zëvendëskryeministri i parë për Integrim Evropian, Zhvillim dhe Dialog, Besnik Bislimi derisa ka raportuar në Komisionin për Integrim Evropian është pyetur nga opozita për arrestimin e kryeshefit të KEK-ut Nagip Krasniqit, i cili dyshohet për korrupsion dhe keqpërdorim të detyrës, raporton InLajmi.
Bislimi nuk e mohoi që ka korrupsion në KEK, por shfajësoi kryeshefin Krasniqi, duke thënë se mëkati i tij i vetëm është fitimi prej 107 milionë euro që i solli KEK-ut ndërsa theksoi se deri me ardhjen e tij kjo kompani kishte pësuar vetëm humbje.
“Por ja që s’ka interes politik të një institucioni që unë do të thoja është politik, siç është Prokuroria që të merret me këto raste. Por, ka interes të merret vetëm me rastin e menaxherit i cili nga një kompani që ka punuar me humbje, e ka sjellë kompaninë me 107 milionë euro profit. Ky ka qenë mëkati i Nagip Krasniqit për të cilin është dashur të arrestohet”, tha Bislimi.
Zëvendëskryeministri tha se Krasniqi e ndryshoi mënyrën e menaxhimit në KEK ndërsa theksoi se të hollat e kompanisë publike nuk shkuan në xhepat e politikanëve siç ndodhte më herët.
“Si ka mundësi që një kompani publike të gjenerojë 107 milionë euro dhe asnjë nga këta të mos përfundojë në xhepat e politikanëve. Ky është problem i madh, andaj duhet të arrestohet që të vijë dikush tjetër pas tij i cili e ndryshon mënyrën e menaxhimit”, shtoi zëvendëskryeministri. /InLajmi/
