Kryetari i Lidhjes Demokratike të Kosovës Lumir Abdixhiku, ka reaguar pas publikimit të draft-statutit të Asociacionit të përpiluar nga Ekipi Menaxhues, përcjell InLajmi.
Abdixhiku konsideron se ky draft-statut është në kundërshtim me Kushtetutën e Kosovës.
Kryetari i LDK-së thekson se ky dokument është më tepër se Asociacion dhe është më tepër se autonomi, si “shtet brenda shtetit apo Republikë brenda Republikës”.
Ai thotë se ky draft-statut duhet të refuzohet si bazë negociuese, por edhe si ambicie politike ndërsa i bën thirrje Qeverisë së Kosovës që këtë çështje ta zgjidhë vetëm brenda rendit kushtetues.
Në fund, ai thotë “çdo ikje nga përgjegjësia është dorëzim dhe çdo dorëzim sjell dokumente e koncepte të tilla; siç ka ndodhur dhe me këtë tani”.
Postimi i plotë i tij:
SHTET BRENDA SHTETIT
Dokumenti i draft-statutit, i përpiluar nga Ekipi Menaxhues, e i bërë publik në medie është më tepër se Asociacion dhe është më tepër se Autonomi – është shtet brenda shtetit; Republikë brenda Republikës. Ky draft-statut, në të 67 nenet e në nëntë kapitujt e tij, projekton Federalizimin e Kosovës si koncept të ri organizativ pas shpalljes së pavarësisë.
Një trup që nxjerrë ligje, menaxhon asete kombëtare, pasuri publike e burime natyrore, një trup që organizon zgjedhje, mbanë referendume e merr kompetenca nga Kuvendi dhe Qeveria e Kosovës – nuk ka vend në rregullimin tonë shtetëror e kushtetues.
Si i tillë, ai jo vetëm që duhet të refuzohet si bazë negociuese por dhe të refuzohet si ambicie politike. Në Kosovë nuk do të ketë parti, nuk do të ketë qeveri e nuk do të ketë njeri që mund ta pranojë një organizim të tillë.
Qeveria e Kosovës ndërsa, duhet të marrë pronësinë në procesin vijues. Asociacioni bëhet nga institucionet tona dhe atë vetëm brenda rendit tonë kushtetues. Çdo ikje nga përgjegjësia është dorëzim dhe çdo dorëzim sjellë dokumente e koncepte të tilla; siç ka ndodhur dhe me këtë tani. /InLajmi/
