Partia Socialdemokrate si çdoherë edhe këtë të martë ka zhvilluar një aksion simbolik, mirëpo kësaj radhe në objektin e Ambasadës së Gjermanisë në Kosovë, për ta faturuar këta të fundit për “importin” e mjekëve në Kosovë, raporton InLajmi.
Anëtari i Kryesisë së PSD-së Zgjim Hyseni, tha se Gjermania po eksporton mallra dhe po “importon” njerëz ndërsa shton se mjekët po i merr falas.
Hyseni thekson se vetëm për 4 muajt e fundit, 91 mjekë janë larguar nga Kosova.
“Sot, për ditën e Evropës kemi ardh me uruar Gjermaninë. Gjermania po eksporton mallra, e po importon njerëz. Mjekët po i marrin falas. Vetëm në 4 muajt e fundit të këtij viti, kanë ikur 91 mjekë, të cilët po të shkolloheshin në Gjermani do të kushtonin 200 mijë euro. Po t’i llogarisim edhe 300 infermierë, që do të kushtonin nga 30 mijë euro. Pra, vetëm këtë vit ne ja kemi dhënë Gjermanisë 27 milionë euro”, tha ai.
Hyseni tha se kjo faturë mund të merret si “faturë e shfrytëzimit”, duke shtuar se Kosova po shprazet dhe po mbet pa mjekë.
“Nëse trendi vazhdon si kështu, kjo i bie që ne e subvencionojmë Gjermaninë. Oda e Mjekëve ka paralajmëruar që brenda 3-4 viteve të ardhshme, Kosova do të mbesë pa mjekë. Kjo është fatura e shfrytëzimit e kemi sjell sot për Ditën e Evropës, por është e kufizuar sepse nuk janë edhe profesionet e tjera. Në tregun e lirë, që po e quajnë, vetëm Kosova po shprazet, nuk po vijnë këtu mjekë gjerman”, tha ai. /InLajmi/
