Më 15 dhjetor të vitit të kaluar, kryeministri i vendit Albin Kurti i kishte dorëzuar Çekisë, vendit që kryesonte Presidencën e Bashkimit Evropian, aplikimin e Kosovës për anëtarësim në Bashkim Evropian, shkruan InLajmi.
Dita e Evropës e gjen Kosovën larg aspiratës për të qenë pjesë e Bashkimit Evropian derisa shpresat për t’u bërë pjesë e këtij unioni janë të vogla, pasi Kosovën e pret një rrugëtim i gjatë deri në plotësimin e kritereve që BE ka për shtetet kandidate.
Analistë politikë nuk shprehen optimistë sa i përket anëtarësimit të shpejtë të Kosovës në Bashkimin Evropian. Ata theksojnë se në këtë rrugëtim, Kosova do të hasë në pengesa, përfshirë atë nga 5 shtetet mosnjohëse, por edhe mosplotësimin e standardeve të vendosura nga BE.
Profesori i marrëdhënieve ndërkombëtare, Dritëro Arifi, në një deklaratë për InLajmin, tha se gjasat që Kosova të pranohet në Bashkimin Evropian janë minimale ndërsa shton se këto pengesa janë më shumë politike sesa teknike.
Arifi thotë se po të mos ishte ky proces politik, atëherë anëtarësimi i Kosovës do të merrte kohë më së shumti deri në 18 muaj sipas procedurave.
“Gjasat që Kosova të pranohet në Bashkimin Evropian janë minimale sepse kushtimisht është proces politik, pasi po të mos kishte qenë politik, kjo normalisht do të merrte kohë sipas procedurave deri në 18 muaj. Në njëfarë forme Këshilli i Evropës e autorizon Komisionin Evropian që ta bëjë një vlerësim të gjendjes së shtetit anëtar, në mënyrë që të konstatojë se sa i plotëson kushtet për të qenë pjesë e saj”, tha ai.
Tutje, profesori Arifi thotë se rrugëtimi i Kosovës drejt Bashkimit Evropian has në pengesa, por nuk përjashton faktin se ky proces është mjaft delikat ndërsa përmend procedurat që duhet të kalojnë nga Parlamenti Evropian te Këshilli i Ministrave për të vendosur në formë unanime që Kosova të bëhet pjesë e saj.
“Rrugëtimi i Kosovës drejt BE-së ka pengesa, të cilat më shumë janë politike sepse standardet plotësohen gjatë rrugës dhe procesi zgjat aq sa shteti kërkues është serioz në implementimin dhe standardet e Bashkimit Evropian, por duhet kuptuar që ky proces është delikat sepse duhet të kalojë përmes Parlamentit Evropian dhe në fund Këshilli i Ministrave duhet ta vendosë në formë unanime, prandaj problemi është më shumë politik sesa teknik”, tha Arifi për InLajmin.
Për më tepër, Arifi vlerëson se Kosova është e fundit në rajon sa i përket implementimit të standardeve, ligjeve, por edhe mentalitetit evropian ndërsa thekson se zhvillimi i brendshëm paraqet një sfidë shtesë për të rrugëtuar drejt BE-së.
“Kosova është larg nga plotësimi i standardeve që i kërkon Bashkimi Evropian. Ajo është e fundit në rajon sa i përket implementimit të standardeve, ligjeve dhe mentalitetit evropian. Duhet të punohet shumë që gjërat t’i bëjmë jo për Bashkimin Evropian, por për të ardhmen tonë”, tha ai.
Edhe pse Kosova i ka plotësuar të gjitha kriteret që të jetë pjesë e Bashkimit Evropian, analisti Albinot Maloku, nuk shprehet opitimist se ky proces mund të ndodhë shpejt, pasi siç thekson ai, ngecja kryesore në këtë proces qëndron tek mosnjohja nga 5 shtetet e BE-së.
“Qeveria por edhe qytetarët e dinë që rrugëtimi i Kosovës drejt anëtarësimit në BE do të marrë kohë. Arsyet janë të shumta por thelbësisht ndërlidhen me 5 shtetet mosnjohëse të BE-së, por edhe të problemeve që BE i ka të shumta. Mos të flasim edhe për raste të tilla siç ishte qendrimi me Hungarinë, ku ajo votoi kundër në Këshillin e Evropës, kur Kosova e pati aplikimin e saj”, tha ai për InLajmin.
Tutje, analisti Maloku thotë se vullneti i Kosovës për të plotësuar kriteret e BE-së ka shkuar deri në “iracionalitet” ndërsa shton se tani vendimi kryesor i mbetet BE-së nëse do të zgjerohet ose jo edhe me vendet e Ballkanit Perëndimor.
“Vullneti i Kosovës për të plotësuar kriteret e BE-së shkon deri në iracionalitet, pra sa i përket kushteve, vendi ynë i ka plotësuar gati të gjitha. Bashkimi Evropian ka nevojë të sqarohet me veten e vet nese do të ndodhë zgjerimi i saj edhe për vendet e Ballkanit Perëndimor, e të mos provojë aso paradhomash siç planifikonte presidenti francez Macron”, tha Maloku.
Pavarësisht se krerët e Kosovës thonë se momenti për aplikim në BE dhe KE është i volitshëm, autoritetet ndërkombëtare thonë se hapi i parë është normalizimi i marrëdhënieve me Serbinë. Shqipe Vishaj /InLajmi/
