Ligji për Pagat në sektorin publik është miratuar në lexim të 2-të në dhjetorit të vitit të kaluar në Kuvendin e Kosovës, ky projektligj mori mbështetjen e shumicës së deputetëve, pro të cilit votuan 63 deputetë, përcjell InLajmi.
Ligji i Pagave rregullon çështjen e pagave për mbi 82.000 punëtorë të sektorit publik, megjithatë me këtë ligj nuk kanë qenë të kënaqur shumë punonjës të sektorëve të ndryshëm.
E këto pakënaqësi më së shumti po i shprehin sindikatat e punonjësve policorë dhe zjarrëfikësve meqë ende nuk u janë ekzekutuar shtesat për rrezikshmëri edhe pas disa muajve nga miratimi i Ligjit të ri të Pagave.
E mosekzekutimin e këtyre shtesave Imer Zeqiri nga Sindikata e Policëve të Kosovës e quajti skandal të qeverisë Kurti, duke shtuar se kjo se ka krijuar pakënaqësi të madhe tek zyrtarët policorë.
“Jemi njëri nga institucionet në vend që duke kryer me detyrat zyrtare e rrezikojmë shëndetin dhe veten, kjo është absurde dhe nuk ka logjikë. Kam kontakte të vazhdueshme me zyrtarët policorë dhe ata thonë kur nuk kemi shtesa për rrezikshmëri, pse e mbajmë armën? Pra mosekzekutimi i shtesave për rrezikshmëri në punë është një skandal i qeverisë”, deklaroi Kryetari i Sindikatës së Policëve të Kosovës, Imer Zeqiri.
Tutje Zeqiri ka shprehur shqetësimin për largimin me vullnet të policëve nga detyra dhe se për shkak të paknaqësive me pagën, por edhe mosekzekutimin e shtesave për rrezikshmëri numri i dorëheqjeve nga policia e Kosovës po rritet vazhdimisht.
“Pra pagat jo të dinitetshme, mospagesa e shtesave për rrezikshmëri ka krijuar një pakënaqësi jashtëzakonisht të madhe, e që kjo pakënaqësi shprehet dhe në mënyrë individuale, që është ajo më e keqja me dorëheqje vullnetare nga policia. Prandaj në vazhdimësi kemi edhe dorëheqje që pikërisht lidhen me paknaqësinë me Ligjin e Pagave dhe shtesave për rrezikshmëri”, u shpreh Zeqiri.
Për më tepër, sidikalisti Zeqiri bën thirrje qeverisë që të mos neglizhojë çështjen e shtesave për rrezikshmëri në punë për policët, ndryshe tha ai situata do të ndryshojë radikalisht.
Nuk dha detaje se për çfarë ndryshimesh bëhet fjalë nëse qeveria nuk bën ekzekutimin e shtesave të rrezikshmërisë, por Zeqiri bëri të ditur se të gjitha veprimet e shprehjes së pakënaqësive do të merren sipas kërkesave që do të adresohen në sindikatë nga ana e pjesëtarëve të Policisë së Kosovës.
Ndryshe, Ministria e Financave dhe e Punëve të Brendshme muaj më parë kishin premtuar se në pagën e muajit mars do të nisë ekzekutimi i shtesave në pagë, premtim që nuk është mbajtur. Libona Gegaj /InLajmi/
