Deputeti i PDK-së, Hisen Berisha, e ka quajtur tallje të lidershipit kosovar, deklaratën e kryetarit të Kuvendit, Glauk Konjufca për dialogun.
Ai në një prononcim për Gazeta Blic, thotë se kjo është retorikë mashtruese ndaj me shqiptarët.
“Kjo është tallje e lidershipit kosovar, Presidentes, Kryeministrit dhe Kryekuvendarit me qytetarët. Kjo është retorikë mashtruese me të cilën po manipulojnë me shqiptarët që nga dalja në skenën politike si subjekt politik, përtej “patriotizmit jugosllav” në frymën e të cilit janë rritur e kalitur që në familjet e tyre, të cilin e kanë treguar si organizatë KAN dhe aktivitete për stimulimin e martesave në mes të rinjve e të rejave serb e shqiptarë, apo standardeve që do ta krijonin terrenin politik për implementimin e parimeve të “lëvizjes për Jugosllavinë”, të jugonostalgjikëve të udhëhequr nga Veton Surroi e marioneta e tij patetike Albin Kurti, të “jugoslavenve të bashkuar” për “Jugosllavinë e re””, thotë Berisha.
Deputeti i PDK-së vlerëson se VV ndërtoi kauza të rreme me të cilat e helmuan brezi e ri dhe mërgatën.
“Në kontekst të këtij objektivi programor edhe nxitën luftën e urrejtjes dhe mohimit të çdo arritjeje me rezistencën paqësore aktive dhe vetë luftën për liri të UÇK-së, deri aty sa e cilësuan edhe vet aktin e pavarësisë si akt tradhtie. Ndërtuan kauza të rreme me të cilat e helmuan brezin e ri dhe mërgatën, me urrejtje ndaj vlerave të lirisë dhe bartësve të luftës për liri dhe vet shtetit”, potencon Berisha.
Andaj, ai shton se këto deklarata janë patetizëm patriotik dhe retorikë e mashtrimit albinian.
“Prandaj, edhe kjo sagë deklaratash plotë patetizëm patriotik, është retorika e mashtrimit albinian dhe debatikasve të ri me koncept të vjetër neokomunist. Këta do të pranojnë çdo gjë, siç edhe kanë dëshmuar deri me sot. Kjo çfarë po deklarojnë tani kur veç e kanë bërë dëmin ndaj interesave të shtetit s’është gjë tjetër veç se lojë për votuesit e tyre që i cilësojnë “analfabet funksional”, deklaron deputeti i PDK-së.
“Nëse vërtetë mendojnë siç ka deklaruar Glauku dhe jo vetëm, por edhe Albini në mediat kroate, edhe Presidentja në mediat tona, më se një muaj pas dakordimit për Planin franko – gjerman dhe Aneksin e Ohrit alias ofertën e Millosheviçit, që nuk dallon nga ajo që kishte sjellë në vitet 1995/96 pra një ofertë që më vonë e artikuloi “më shumë se autonomi dhe më pak se pavarësi” apo sloganin që po e përmbush me piken 7 të Planit, se “aty ku ka një serb do të jetë Serbi”, le të urdhërojnë ta provojnë këtë”.
Berisha deklaratën e Konjufcës e krahason me deklaratat e VV-së për bashkim kombëtar, ku tani kaluan në Zajednicë me autonomi.
“Pra, deklaratat e z. Konjufca, po ua them shkurt, janë retorikë e zakonshme e njerëzve të papërgjegjshëm që ka qeveria e LVV-ja, ku takon edhe z. Konjufca.
Në kemi parë deri tani metamorfozën e këtyre njerëzve, nga kauza për “bashkimi kombëtar”, në “Republikë të tretë”, nga kauza kundër “Zajednicë” në “Zejadnicë me autonomi”, nga zhvillimi ekonomik në falimentim ekonomik dhe mjerim social, nga përmbyllja e procesit politik të shtetësisë së Kosovës, në falimentim të shtetit si koncept politik, deri në defunksionalizim institucional. Kjo klasë politike e ka kthyer dialogun në mekanizëm që po e pengon në zhvillim shtetin, edhe pse është në interesin e Kosovës përmbyllja e tij me njohje të ndërsjellë me Serbinë dhe garancën ndërkombëtare, me theks atë të SHBA përmes Marrëveshjes së Uashingtonit si e vetmja derë dalje për raportin Kosovë- Serbi”, përfundon deputeti i PDK-së, Hisen Berisha.
