Këtë të mërkurë shënohet Dita Botërore e Lirisë së Shtypit për të ngritur vetëdijen dhe rëndësinë e lirisë së shtypit dhe për t’ua kujtuar qeverive detyrën që kanë në drejtim të respektimit të të drejtës së shprehjes së lirë që është e garantuar me nenin 19 të Deklaratës së Përgjithshme të të Drejtave të Njeriut, shkruan InLajmi.
Për gazetarë dhe media, liria e shprehjes është e rëndësishme për shkak të rolit të tyre në zbulimin e së vërtetës, informimin e publikut, mbajtjen përgjegjës të politikanëve, kërkimit të llogaridhënies nga autoritetet publike dhe të drejtën që të jenë vazhdimisht skeptikë ndaj veprimeve të qeverisë.
Lirinë e shprehjes e minojnë rastet e sulmeve fizike dhe kërcënimeve verbale ndaj gazetarëve, gjë e cila ndodh edhe në Kosovë, e kohëve të fundit kjo dukuri duket se është shpeshtuar.
Organizata Gazetarët pa Kufij në Treguesin Botëror të Lirisë së Shtypit radhiti Shqipërinë dhe Kosovën në mesin e vendeve problematike sa i përket lirisë së shprehjes. Megjithatë sipas indeksit që u publikua të martën, edhe Shqipëria edhe Kosova kanë shënuar rritje në krahasim me një vit më parë.
Asociacioni i Gazetarëve të Kosovës në Ditën Botërore të Lirisë së Shtypit ngriti shqetësimin për sulmet e vazhdueshme verbale dhe fizike ndaj gazetarëve në Kosovës ndërsa i bëri thirrje Prokurorisë në Kosovë që këto raste t’i trajtojë me seriozitet.
“Shqetësimet tona kryesore mbesin kualifikimi i gabuar i veprave penale nga ana e prokurorëve ndaj sulmueseve të gazetarëve, kryesisht duke përzgjedhur vepra më të lehta penale dhe zvarritja e rasteve në gjykata dhe dënimet jashtëzakonisht të ulëta ndaj sulmueseve të gazetarëve të shqiptuara nga gjykatësit. Ne kërkojmë nga prokurorët që në rastet e sulmeve ndaj gazetarëve të ndërmarrin hetime profesionale dhe të pavarura dhe akuzat ndaj sulmueseve të gazetarëve t’i përpilojnë duke marrë parasysh jo vetëm rrethanat lehtësuese por edhe ato rënduese me qellim të dekurajimit të sulmeve ndaj gazetarëve. Nga gjyqtarët kërkojmë që rastet e sulmeve ndaj gazetarëve të trajtohen me prioritet të lartë dhe sulmuesit të marrin dënime që reflektojnë rrezikshmërinë që iu kanoset gazetarëve e jo të shqiptohen dënime të lehta”, thuhet në deklaratën e AGK-së.
Drejtori ekzekutiv i Këshillit të Mediave të Shkruara të Kosovës, Imer Mushkolaj, në një deklaratë për InLajmin, flet për lirinë e shprehjes në Kosovë ndërsa përmend sfidat dhe problemet me të cilat gazetarët përballen çdo ditë.
Mushkolaj thotë se Kosova qëndron më mirë sa i përket lirisë së shprehjes në krahasim me vendet e rajonit gjersa shton se askush nuk duhet të jetë i kënaqur me këtë fakt, pasi mediet çdo ditë përballen me sfida dhe probleme të ndryshme.
“Kosova nuk qëndron keq në këtë aspekt, në krahasim me vendet e rajonit. Por askush nuk duhet të jetë i kënaqur me këtë sepse gazetarët dhe mediat përballen çdo ditë me sfida dhe probleme të ndryshme që nga mungesa e transparencës institucionale, e deri te kushtet e punës në media”, tha Mushkolaj për InLajmin.
Kryetari i KMSHK-së gjithashtu shpreh shqetësimin për sigurinë e gazetarëve në Kosovë, duke theksuar se gjendja sa i përket sigurisë së tyre nuk është e kënaqshme ndërsa i bën thirrje institucioneve për hartimin e strategjive të reja, në mënyrë që sulmet e gazetarëve të adresohen dhe “pandeshkueshmëria” ndaj sulmeve të marrë fund.
“Gjendja e sigurisë së gazetarëve nuk është e kënaqshme në Kosovë. Sidomos gjatë punës në terren ata janë “në mëshirë të fatit” dhe potencialisht të ekspozuar ndaj rreziqeve dhe sulmeve të ndryshme”, duke shtuar se gazetaria është profesion me rrezikshmëri tejet të lartë dhe si i tillë duhet të trajtohet nga të gjithë, që nga redaksitë në të cilat gazetarët punojnë dhe deri në nivelin institucional. /InLajmi/
