Kryeministri i Kosovës Albin Kurti këtë të mërkurë përkujtoi 24 vjetorin e Masakrës së Bukoshit, përcjell InLajmi
Kurti deklaroi se shteti serb duhet mbajtur përgjegjëse për krimet e luftës, krimet kundër njerëzimit dhe veprimet gjenocidale të kryera në Kosovë.
Ai shtoi se kriminelët e luftës duhet nxjerrur para drejtësisë dhe se Kosova nuk mund të fas e as të harrojë.
Postimi i plotë i tij:
Më 3 maj 1999 oborri i shkollës në Bukosh u mbulua me gjak. 25 burra dhe djem të rinj shqiptarë u pushkatuan. Forcat policore të Serbisë i vranë ata, vetëm pse ishin shqiptarë.
I ekzekutuan pasi i ndanë nga kolona e banorëve të fshatrave të Suharekës, që i kishin dëbuar nga shtëpitë e tyre. Dëbimi, vrasja dhe zhdukja me forcë e shqiptarëve ishte pjesë e projektit gjenocidal të Serbisë për shfarosjen e shqiptarëve, “Patkoi”.
Kriminelët e luftës duhet nxjerrur para drejtësisë. Serbia duhet mbajtur përgjegjëse për krimet e luftës, krimet kundër njerëzimit dhe veprimet gjenocidale të kryera në Kosovë.
Republika e Kosovës nuk mund të falë e as të harrojë.
Në përvjetorin e 24-të, përkujtojmë martirët e Masakrës së Bukoshit. Lavdi! /InLajmi/
