14-vjeçari i cili vrau 8 fëmijë dhe një roje në shkollën e Beogradit “Vladislav Ribnikar” mëngjesin e sotëm dhe nga të shtënat plagosi 6 nxënës të tjerë dhe një mësuese, e kishte planifikuar këtë krim për një muaj. Siç u bë e ditur në konferencën për shtyp, në banesën e djalit u gjetën lista me emrat e fëmijëve që ai synonte të vriste, si dhe një plan të vizatuar të shkollës. Pas sulmit iu gjetën 2 pistoleta të babait të tij, të cilat siç u tha në konferencë, i kishte marrë nga kasaforta, po ashtu dihet se ka ditur të përdorë armët pasi ka ushtruar me të atin për të qëlluar, transmeton InLajmi
Shefi i departamentit të policisë së qytetit të Beogradit, Veselin Miliq, ka konfirmuar se krimi ishte përgatitur për një muaj dhe se djali kishte lista me emrat e nxënësve që kishte për qëllim t’i vriste.
“Kjo është planifikuar për një muaj. Ai e kishte planifikuar këtë për një kohë të gjatë, nuk dihet motivi. Ai e mori armën e zjarrit nga banesa e babait të tij dhe me katër kokteje molotov”, tha Miliq.
Në konferencë Miliq, bëri të ditur se listën që kanë gjetur në banesën e djalit ku ishin të shkruar emrat e nxënësve që ai planifikoi të vriste. Përveç kësaj, ai kishte një plan të saktë të shkollës, me hyrje dhe dalje të shënuar.
“Kam qenë në mijëra krime, tragjedi të kryera, por kjo është e padëgjuar në shoqërinë serbe. Menjëherë pas ngjarjes, anëtarët e MPB-së i kanë hequr lirinë djalit. Publiku duhet të ndërgjegjësohet për gjithçka që prodhoi ky krim, i planifikuar për një muaj. Ende nuk dihen motivet e këtij krimi. Pas mbërritjes në shkollë, ai ka qëlluar menjëherë në rojen e sigurisë, pas së cilës është kthyer kah fëmijët dhe ka qëlluar”, ka thënë Miliq.
Ai shtoi se djali ka lajmëruar vetë policinë pas krimit.
Nga ana tjetër ministri i Arsimit Branko Ruzhiq ka konfirmuar se fatkeqësisht kanë humbur jetën 8 fëmijë, si dhe një pjesëtar i sigurimit të shkollës, ndërsa nxënësit e lënduar dhe një mësues janë shtruar në spital.
“Askush nuk mund t’i kthejë fëmijët te prindërit e tyre. Ngjarja ka ndodhur mëngjesin e sotëm në orën 08:40 kur një nxënës i klasës së 7-të ka kryer këtë akt i tillë për herë të pare në Serbi”, tha Ruzhiq.
Ai, bëri të ditur se janë angazhuar një ekip psikologësh për të ofruar mbështetje për nxënësit dhe prindërit në këtë periudhë traumatike.
“Është e paimagjinueshme se si ishte për ata fëmijë që e përjetuan atë frikë. Qeveria ka marrë vendim për 3 ditë zie në të gjithë territorin e Serbisë, duke filluar nga e premtja deri të dielën. Për shkak të kësaj ngjarje mësimi nuk do të mbahet sot në turnin e pasdites. Nga nesër mësimet do të nisin me një minutë heshtje”, tha Ružić.
Ministrja e Shëndetësisë Danica Grujiçiq tha mes lotësh se kjo është dita më e vështirë në karrierën e saj 40-vjeçare, shkruan roditelji.me
“8 fëmijë dhe një burrë që po bënte punën e tij vdiqën në shkollë. 6 fëmijë dhe mësuesja e tyre u vendosën në objekte shëndetësore. 2 djemtë që ndodhen në Tirsovë janë në gjendje të qëndrueshme dhe jashtë rrezikut për jetën, janë qëlluar me plumb në këmbë. Fatkeqësisht, vajza e 3-të është në gjendje kritike, ka marrë një plagë me armë zjarri në kokë, por dëmi është i madh, bëmë gjithçka që mundëm. Një nxënës ka një dëmtim në këmbë ndodhet në qendrën e urgjencës, aktualisht ndodhet në sallë. Mësuesja e cila kishte një dëmtim të legenit është ende në sallë dhe jeta e saj është në rrezik. I shpreh ngushëllimet e mia të sinqerta prindërve që humbën fëmijët e tyre. Në 40 vitet e shërbimit tim, kjo është ndoshta përvoja ime më e tmerrshme, si mjeke dhe si person. Dëshiroj të falënderoj kolegët e mi nga Shërbimi i Emergjencave që u përgjigjën shpejt. Instituti për Shëndet Mendor ka organizuar dy telefona që do të jenë në dispozicion për të gjithë ata që kanë nevojë për ndihmë”, tha Grujiçiq./InLajmi/
