Kryetari i Komunës së Drenasit Ramiz Lladrovci këto ditë po qëndron në Hagë ku po takohet me krerët e UÇK-së, përcjell InLajmi.
Lladrovci deklaroi se vizitat nuk ishin të lehta sepse, këta burra të dheut i duhen familjeve të veta, i duhen Kosovës.
A i shtoi se beson se drejtësia do të triumfoj ku shtoi se Kosova është e mangët pa ta.
Postimi i plotë i tij:
Pas vizitës në ditën e parë te Hashimi e Kadriu, në ditën e 2 i vizitova Jakupin, Rexhën, Nasimin dhe Hysniun. Për besë nuk ishte për mua e lehtë vizita, sepse, këta burra të dheut i duhen familjeve të veta, i duhen Kosovës.
Këta heronj të gjallë, nuk e kanë merituar largimin as nga shteti për të cilin aq shumë kontribuan.
Çlirimtarët që sot gjenden në Hagë, çdo pjesë të jetës e kanë të lidhur me Kosovën dhe fatin e popullit të Kosovës, andaj, ata e kanë vendin në Kosovë, pranë më të dashurve të tyre.
Kam besim të plotë se drejtësia do të triumfojë.
Kosova është e mangët pa ta. Kosova nuk guxon të mbetet pa historinë që u krijua me plagë e gjak e djersë deri në vetëmohim. Historia janë ata, të cilët iu gjenden popullit të vet në momentet më të rënda, duke krijuar aleancë historike me NATO-n, krijuan dhe fuqizuan shtetin.
Jakupi, Rexhepi, Nasimi dhe Hysniu, janë atdhetarë të dëshmuar që na mungojnë, morali i tyre është shembull si duhet atdheu.
Çlirimtari e ka për qëllim çlirimin dhe çdo minutë pas arritjes së qëllimit, është dhuratë madhështore për secilin çlirimtar.
Hashimin, Kadriun, Jakupin, Rexhepin, Nasimin, Hysniun dhe të tjerët, i pret Kosova fitimtarë, do të jenë fitimtar sikur në të gjitha betejat deri sot. Historia na dha të drejtë për çlirim, për këtë na ndihmoi edhe NATO edhe bota demokratike. /InLajmi/
