Fondacioni “Hasan Prishtina”, Shoqata “Luma” nga Kukësi dhe Instituti i Trashëgimisë Shpirtërore e Kulturore të Shqiptarëve në Shkup këtë të martë me anë të një aksioni simbolik, kundërshtuan propozimin e heqjes së emrit të Hasan Prishtinës nga Universiteti i Prishtinës, raporton InLajmi.
Përfaqësues i Shoqatës Atdhetare Kulturore “Luma”, profesori Shefqet Hoxha për propozimin për heqjen e emirit të tij nga UP-ja të Hasan Prishtinës tha se as populli nuk do ta pranojë një gjë të tillë.
“Të hiqet emrin prej këtij Universiteti për mua është një çmenduri, sepse është një prej figurave më të ndritshme të Kosovës dhe Shqipërisë. Populli nuk do ta pranojë këtë. Kategorikisht nuk duhet t’i hiqet emri Universitetit të Prishtinës”.
Ndërsa nipi i Hasan Prishtinës, Mehmet Prishtina që njëherësh përfaqëson edhe Fondacionin “Hasan Prishtina”, kundërshtoi ashpër këtë vendim duke shtuar që UP-ja ka probleme të tjera që duhet të merret.
“Kemi ardh sot këtu që ta kundërshtojmë rreptë iniciativën e rektorit të UP-së që ta tërheqë emrin e Hasan Prishtinës nga Universiteti. Pra, sot kemi ardhur ti themi stop, mos na e prek Hasan Prishtinën. UP-ja ka probleme të tjera, ai duhet që të merret me ngritjen e cilësisë së arsimit”, deklaroi ai.
E nipi i Hasan Prishtinës kërkoi edhe shkarkimin e rektorit nga kjo pozitë duke shtuar se ai e ka nisur mbrapsht reformën.
“Një nismë e një rektori të porsazgjedhur duhet të përfundojë me largimin e tij. Ai e ka nisur mbrapsht reformën. Reformat rrënjësore janë të nevojshme, por ata duhet të nisen mbarë dhe jo me heqjen e emrit të kolosit tonë ndërkombëtar. E dimë të gjithë se Hasan Prishtina ishte arkitekt i Shqipërisë. Ai ndau gjithë pasurinë e tij që t’i shkollojë nga të gjitha trojet etnike djemtë që i ka dërguar në Normalen e Elbasanit”, shtoi tutje ai. /InLajmi/
